28 იანვრიდან 4 თებერვლის ჩათვლით დაგეგმილია საქართველოს საგარეო საქმეთა მინისტრის თამარ ბერუჩაშვილის პირველი სამუშაო ვიზიტი ამერიკის შეერთებულ შტატებში.
ვიზიტის ფარგლებში დაგეგმილია თამარ ბერუჩაშვილის შეხვედრა აშშ-ის ვიცე პრეზიდენტთან ჯო ბაიდენთან აღმოსავლეთ ევროპის საგარეო საქმეთა მინისტრების შეხვედრის ფორმატში. საგარეო საქმეთა მინისტრი ასევე შეხვდება აშშ-ის აღმასრულებელი და საკანონმდებლო ხელისუფლების წარმომადგენლებს, ასევე ამერიკის წამყვან კვლევით ცენტრების და მედიის წარმომადგენლებს.
საგარეო უწყების ინფორმაციით, ვიზიტის ფარგლებში, მინისტრი სიტყვით გამოვა ატლანტიკური საბჭოს კონფერენციაზე სახელწოდებით „ტრანსატლანტიკური სტრატეგია აღმოსავლეთ ევროპისათვის". აგრეთვე მონაწილეობას მიიღებს აშშ-ის სტრატეგიული და საერთაშორისო კვლევების ცენტრში (CSIS), დაგეგმილ დისკუსიაში, რომელიც ამერიკის ერთ-ერთი უძველესი და გავლენიანი ინსტიტუტია საერთაშორისო პოლიტიკის საკითხებში.
ვიზიტის, შეხვედრების მთავარი თემა იქნება საქართველოს უსაფრთხოების გარემო, ჩვენი ქვეყნის წინაშე არსებული გამოწვევები, საქართველოსა და აშშ-ის სტრატეგიული პარტნიორობის მიმართულებები და თანამშრომლობის გაღრმავების საკითხები, რიგის სამიტი, საქართველოს დემოკრატიზაციის პროცესი.
