სავიზო რეჟიმის ლიბერალიზაციის სამოქმედო გეგმის შესრულებასთან და საქართველოს ენერგეტიკული უსაფრთხოების და ევროპის ენერგეტიკულ გაერთიანებაში საქართველოს გაწევრიანების საკითხებთან დაკავშირებით იმსჯელეს ევროპასთან ინტეგრაციის კომიტეტის სხდომაზე.
„ჩვენ გადავწყვიტეთ მოგვესმინა ორი მნიშვნელოვანი თემა ევროპულ ინტეგრაციასთან დაკავშირებით, რომელიც პირველ რიგში ჩვენ შიდა უსაფრთხოებას და საკუთარი მოქალაქეების კეთილდღეობას უკავშირდება. ერთი არის ვიზის ლიბერალიზაციის სამოქმედო გეგმასთან მიმდინარე პროცესი და მეორე, ენერგოუსაფრთხოების საკითხი, მათ შორის ევროპის ენერგეტიკულ გაერთიანებაში საქართველოს გაწევრიანების პროცესის თაობაზე", - აღნიშნა სხდომის დაწყებისას ევროპასთან ინტეგრაციის კომიტეტის თავმჯდომარემ ვიქტორ დოლიძემ.
სავიზო რეჟიმის ლიბერალიზაციის სამოქმედო გეგმის შესრულებასთან დაკავშირებით ინფორმაცია, სხდომაზე, საგარეო საქმეთა მინისტრის მოადგილემ გიგი გიგიაძემ და იუსტიციის მინისტრის მოადგილემ გოჩა ლორთქიფანიძემ წარადგინეს.
„საგარეო საქმეთა სამინისტროსთვის ერთ-ერთ პრიორიტეტს სავიზო რეჟიმის ლიბერალიზაციის სამოქმედო გეგმით გათვალისწინებული პროცედურების მაისში, რიგის სამიტისთვის წარმატებით დასრულება წარმოადგენს. ევროკავშირთან სავიზო რეჟიმის ლიბერალიზაცია საქართველოს მთავრობისთვის უმნიშვნელოვანესი პრიორიტეტია, ვინაიდან ევროკავშირის წევრ ქვეყნებთან უვიზო მიმოსვლა ჩვენი ქვეყნის მოქალაქეებისთვის ევროინტეგრაციის ერთ-ერთი ყველაზე ხელშესახები სარგებელი იქნება", - აღნიშნა გიგი გიგიაძემ.
მან პირველი ფაზის ფარგლებში საკანონმდებლო მოთხოვნების იმპლემენტაციის პროცესზე და განხორციელებულ ინსტიტუციონალურ რეფორმებზე ისაუბრა.
„აღნიშნული რეფორმები გატარდა დოკუმენტების უსაფრთხოების, მიგრაციის საზღვრის მართვის სფეროებში, მნიშვნელოვანი ნაბიჯები გადაიდგა ორგანიზებულ დანაშაულთა ბრძოლისა და ამ სფეროში საერთაშორისო თანამშრომლობის გაძლიერების კუთხით. შიქმნა პერსონალურ მონაცემთა დაცვის ინსპექტორის ინსტიტუტი, მიღებულ იქნა ადამიანის უფლებათა დაცვის სტრატეგია და სამოქმედო გეგმა, ასევე, ანტიდისკრიმინაციული კანონი. ეს მხოლოდ მცირე ჩამონათვალია იმ ღონისძიებებისა, რომელიც სამოქმედო გეგმის მე-4 ბლოკის თანახმად, საქართველოს მთავრობამ განახორციელა. პროცესი იყო საკმაოდ რთული და კომპლექსური, რომელიც დიდ დროს და ძალისხმევას მოითხოვდა როგორც აღმასრულებელი ასევე, საკანონმდებლო ხელისუფლების მხრიდან", - აღნიშნა მომხსენებელმა.
მისივე ინფორმაციით, საქართველოს მთავრობა ინტენსიურად განაგრძობს მე-2 ფაზის იმპლემენტაციის პროცესს. „ჩვენი მიზანია 2015 წლის მაისის რიგის სამიტისთვის სავიზო რეჟიმის ლიბერალიზაციის სამოქმედო გეგმის იმპლემენტაციის პროცესის დასრულება და ევროკომისიის დადებითი შეფასების მიღება უვიზო მიმოსვლის რეჟიმის შემოღებასთან დაკავშირებით", - აღნიშნა მინისტრის მოადგილემ.
იუსტიციის მინისტრის მოადგილემ გოჩა ლორთქიფანიძემ, ყურადღება უწყების კომპეტენციაში შემავალ საკითხებზე გაამახვილა. მან როგორც მიღწევებზე, ასევე, არსებულ გამოწვევებზე - დოკუმენტების უსაფრთხოებაზე; საზღვრისა და მიგრაციის მართვაზე; საზოგადოებრივი წესრიგსა და უსაფრთხოებაზე და საგარეო ურთიერთობებსა და ადამიანის უფლებებზე ისაუბრა.
საქართველოს ენერგეტიკული უსაფრთხოების და ევროპის ენერგეტიკულ გაერთიანებაში საქართველოს გაწევრიანების პროცესსა და პერსპექტივებთან დაკავშირებით ენერგეტის მინისტრის მოადგილემ ირაკლი ხმალაძემ ისაუბრა.