დღეს, იური ვაზაგაშვილს კასპის რაიონის სოფელ ყარაფილაში დაკრძალავენ. გუშინ კი ვაზაგაშვილის ცხედარი სამების საკათედრო ტაძარში იყო დასვენებული, სადაც საქართველოს კათოლიკოს-პატრიარქმა უწმინდესმა და უნეტარესმა ილია მეორემ პანაშვიდი გადაუხადა.
სამბის ტაძარში ასევე იმყოფებოდნენ, მთავრობის წევრები და ყოფილი პრემიერ-მინისტრი ბიძინა ივანიშვილი, რომელმაც ვაზაგაშვილის ოჯახს მიუსამძიმრა.
შეგახსენებთ, რომ იური ვაზაგაშვილი 20 იანვარს, შვილის, ზურაბ ვაზაგაშვილის საფლავზე გარდაცვლილი იპოვნეს. ის აფეთქების შედეგად დაიღუპა. აღნიშნულ ფაქტთან დაკავშირებით მთავარმა პროკურატურამ გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.
იური ვაზაგაშვილი წლების მანძილზე ითხოვდა 2006 წელს, სპეცოპერაციის შედეგად დაღუპული შვილის, ზურაბ ვაზაგაშვილის საქმის გამოძიებას, რომელიც ამ დრომდე არ არის დასრულებული.
მასალის გამოყენების პირობები