ადვოკატთა ასოციაციის თავმჯდომარის ზაზა ხატიაშვილის განცხადებით, იური ვაზაგაშვილმა მისი შვილის საქმეზე ახალი მტკიცებულებებ მოიპოვა და მისი აფეთქებაც სწორედ ამას უკავშირდება.
„ადამიანი იბრძოდა იმისთვის, რომ მისი შვილის მკვლელობის ფაქტი გამოეძიებინა. იპოვა ახალი მტკიცებულებები და ვანდალურად მოკლეს. ეს არის მთელი ერის ტრაგედია და ასევე უნდა შეფასდეს, როგორც ტერორისტული აქტი და ხელისუფლებამ ყველა ღონე უნდა იხმაროს, რომ რაც შეიძლება მალე გაიხსნას ეს მკვლელობა," - განაცხადა ზაზა ხატიაშვილმა.
იური ვაზაგაშვილი გუშინ, 20 იანვარს, შვილის, ზურაბ ვაზაგაშვილის საფლავზე გარდაცვლილი იპოვნეს. ის აფეთქების შედეგად გარდაიცვალა.
იური ვაზაგაშვილი წლების მანძილზე ითხოვდა 2006 წელს, სპეცოპერაციის შედეგად დაღუპული შვილის, ზურაბ ვაზაგაშვილის საქმის გამოძიებას, რომელიც ამ დრომდე არ არის დასრულებული.
