საქართველოს საპარლამენტო დელეგაცია, რომელსაც საგარეო ურთიერთობათა კომიტეტის თავმჯდომარე, თედო ჯაფარიძე ხელმძღვანელობს, სამუშაო ვიზიტით უკრაინაში იმყოფება.როგორც ,,ჯი-ეიჩ-ენს" საკანონმდებლო ორგანოდან აცნობეს საპარლამენტო დელეგაციის წევრებმა, რომლის შემადგენლობაში ევროპასთან ინტეგრაციის კომიტეტის თავმჯდომარე ვიქტორ დოლიძე, საგარეო ურთიერთობათა კომიტეტის თავმჯდომარის პირველი მოადგილე ზვიად კვაჭანტირაძე და თავდაცვისა და უშიშროების კომიტეტის თავმჯდომარის მოადგილე დავით დარჩიაშვილი შედიან, შეხვედრები გამართეს უკრაინის უმაღლესი რადას ევროინტეგრაციის კომიტეტის თავმჯდომარესთან, ირინა გერაშჩენკოსთან, საგარეო ურთიერთობათა კომიტეტის თავჯდომარესთან, განა გოპკოსთან, ამავე კომიტეტის წევრებთან და საპარლამენტო ფრაქციების ხელმძღვანელობასთან. შეხვედრა შედგა ასევე, უკრაინის საგარეო მინისტრის მოადგილესთან ოლენა ზერკალთან.
შეხვედრებისას მხარეებმა საქართველოსა და უკრაინის საგარეო პოლიტიკის პრიორიტეტებზე, ორი ქვეყნის ევროპულ და ევროატლანტიკურ მისწრაფებებზე, რეგიონული უსაფრთხოების საკითხებსა და უკრაინაში მიმდინარე მოვლენებზე ისაუბრეს.
ყურადღება გამახვილდა საქართველოსა და უკრაინის ოკუპირებულ ტერიტორიებზე არსებულ ვითარებასა და საერთაშორისო საზოგადოების მხრიდან შესაბამისი ნაბიჯების გადადგმის აუცილებლობაზე. მხარეებმა დაადასტურეს საქართველოსა და უკრაინის სუვერენიტეტისა და ტერიტორიული მთლიანობის მტკიცე მხარდაჭერა საერთაშორისოდ აღიარებულ საზღვრებში.
შეხვედრებზე განსაკუთრებული ყურადღება საკანონმდებლო ორგანოებს შორის თანამშრომლობის გაღრმავებისა და შესაბამის კომიტეტებს შორის კოორდინაციის მნიშვნელობაზე გამახვილდა. დაიგეგმა ორი ქვეყნის პარლამეტების კომიტეტების ერთობლივი სხდომა.
დღეს საპარლამენტო დელეგაცია შეხვედრებს გამართავს უკრაინის უმაღლესი რადას ვიცე-სპიკერთან, ოქსანა სიროედთან და ევროინტეგრაციის კომიტეტის წარმომადგენლებთან.
