სუპერმარკეტების ქსელი სმარტი ფონდ „იავნანასთან" ერთად კიდევ ერთ საქველმოქმედო პროექტს იწყებს. 2015 წლის თებერვლიდან სუპერმარკეტების ქსელ „სმარტის" ერთგულ მომხმარებელს მიეცემა შესაძლებლობა სალაროსთან, ელექტრონულად დაამრგვალოს თანხა და შემოწირულობა გაიღოს პაატა ბურჭულაძის საქველმოქმედო ფონდ „იავნანას" მზრუნველობის ქვეშ მყოფი პატარებისათვის. „სმარტის" ერთგულმა მომხმარებელმა მთელი საქართველოს მასშტაბით „იავნანას" უკვე 140 000-მდე ლარი შეწირა და მნიშვნელოვანი წვლილი შეიტანა მრავალშვილიანი ოჯახებისთვის სახლის შეძენაში, ნიჭიერი სტუდენტების დაფინანსებასა და სოციალურად დაუცველი ოჯახებისთვის სხვადასხვა ტიპის დახმარებაში.
„ვისოლ ჯგუფი" "იავნანას" დაარსების დღიდან მისი ერთგული მხარდამჭერია, რის შედეგადაც ათასობით სოციალურად დაუცველი ბავშვი საკუთარ ოჯახში, მყუდრო გარემოში უკეთესი მომავალის იმედით ცხოვრობს.
„„ვისოლ ჯგუფის" სახელით გვინდა დიდი მადლობა გადავუხადო „სმარტის" ერთგულ მომხმარებელს, ვისთან ერთადაც ჩვენ მნიშვნელოვნად დავეხმარეთ არა მხოლოდ მრავალშვილიან დედებს, არამედ სოციალურად დაუცველ ოჯახებსა და ნიჭიერ სტუდენტებს. ახალი საქველმოქმედო პროექტის ფარგლებში ჩვენ კიდევ მეტ ადამიანს დავეხმარებით, ვისთვისაც ჩვენი გვერდით დგომა უაღრესად მნიშვნელოვანია, ჩვენ ერთად ვქმნით უკეთეს მომავალს და ფონდ „იავნანასთან" ერთად კიდევ მეტ სიკეთეს შთავაგონებთ თითოეულ ადამიანს. სიკეთე ხომ გადამდებია"-, აცხადებს „ვისოლ ჯგუფის" ვიცე-პრეზიდენტი ლევან ფხაკაძე.
`ერთად გადავარჩინოთ მომავალი`- 2004 წელს ასეთი მოწოდებით დააარსა ცნობილმა საოპერო მომღერალმა პაატა ბურჭულაძემ საერთაშორისო საქველმოქმედო ფონდი "იავნანა" და დაარსების პირველივე დღიდან „ვისოლ ჯგუფი" "იავნანას" ერთგული მხარდამჭერია. „სმარტის" ყველა სუპერმარკეტში მთელი საქართველოს მასშტაბით და „ვენდის" ამერიკული რესტორნის ყველა ობიექტზე განთავსებულია „იავნანას" შესაწირი ყუთები, სადაც „სმარტისა" და „ვენდის" ერთგულ მომხმარებელს შესაძლებლობა აქვს წვლილი შეიტანოს სოციალურად დაუცველი მრავალშვილიანი ოჯახებისათვის უკეთესი მომავლის შექმნაში.