თბილისში ელბაქიძის აღმართზე, სადაც ქუჩის ნაწილი ჩამოიშალა, დედაქალაქის მერი დავით ნარმანია მივიდა.
ნარმანიას განცხადებით, აღმართზე ავტოტრანსპორტის გადაადგილება 2-3 თვის განმავლობაში აიკრძალება და აღდგენითი სამუშაოები დაიწყება.
თბილისის მერის განცხადებით, მომხდარს სპეციალური კომისია შეისწავლის და დარღვევების აღმოჩენის შემთხვევაში, ნარმანია არ გამორიცხავს, რომ კონკრეტული პირების პასუხისმგებლობის საკითხიც დადგეს.
"ეს არ იყო უბედური შემთხვევა, ეს არის უყურადღებობის გამო მომხდარი ფაქტი. 2-3 თვის განმავლობაში აღნიშნულ მონაკვეთზე გადაადგილება აიკრძალება და დაიწყება აღდგენითი სამუშაოები. პარალელურ რეჟიმში მოხდება ფაქტის გამოძიება," - აცხადებს დავით ნარმანია.
შეგახსენებთ, რომ, დაახლოებით 11:00 საათზე, ელბაქიძის აღმართზე საავტომობილო გზის მარჯვენა სავალი ნაწილი დაზიანდა, რის გამოც ავტომანქანების მოძრაობა ქუჩის ორივე მხარეს აკრძალულია.
მომხდარის გამო არავინ დაშავებულა.
