,,უნივერსიტეტის შენობის გაყიდვით მთავრობა არა მხოლოდ საქართველოში, არამედ რეგიონში საერთაშორისო დონის ტექნოლოგიური უნივერსიტეტის, ხოლო ბათუმის, როგორც რეგიონის საგანმანათლებლო ცენტრის იდეის პერსპექტივას სპობს. აშშ-ს „ათასწლეულის გამოწვევის კორპორაციის" (MCC) და საქართველოს მთავრობის მიერ შემუშავებული პროექტის ფარგლებში დაგეგმილი იყო, ამერიკული სტანდარტების ბათუმის ტექნოლოგიური უნივერსიტეტის შექმნა. საქართველოს მთავრობის მიერ ამერიკული უნივერსიტეტის ფუნქციონირების წინაპირობად განისაზღვრა საქართველოში ამერიკული დიპლომის გაცემა, ასევე სწავლების საფასურის წლიური ზედა ზღვარი 8000-10000 აშშ დოლარი (რაც ამერიკული უნივერსიტეტების სწავლის საფასურის მესამედია). მთავრობის მიერ უნივერსიტეტის განთავსების ადგილად განისაზღვრა ქ. ბათუმი; კორპორაციის ჯამურ ინვესტიციას უნდა შეედგინა 30 მლნ. აშშ დოლარი.2012 წლის ოქტომბრისთვის პრაქტიკულად დასრულებული იყო კონკურსი/ტენდერი, რომლის მეორე ეტაპზე წარმოდგენილი პროექტები შეაფასა დამოუკიდებელმა საერთაშორისო კომისიამ და მათი რანჟირებული რეკომენდაციის საფუძველზე, ტენდერის მეორე ეტაპის წინაპირობა/მოთხოვნები დააკმაყოფილა ორმა განაცხადმა: 1) კონსორციუმი, რომლის შემადგენლობაშიც შედიოდნენ მიჩიგანის სახელმწიფო უნივერსიტეტი, მისურის უნივერსიტეტი, კალიფორნიის უნივერსიტეტის ლოს-ანჟელესის კამპუსი და საქართველოს აგრარული და თბილისის თავისუფალი უნივერსიტეტები. 2) ობურნის უნივერსიტეტი.უნივერსიტეტში სწავლა უკვე 2013 წლიდან იქნებოდა შესაძლებელი", -განაცხადა რატიანმა.

მისივე განმარტებით, მთავრობის ქმედება დანაშაულებრივია, არა მხოლოდ კონკრეტული წარმატებული პროექტის მიმართ,არამედ წარმოადგენს შემაშფოთებელ გზავნილს, რომ ნებისმიერი საერთაშორისო პროექტი, კერძო ინვესტიცია და თავად სახელმწიფოს მიერ განხორციელებული პროექტები არ არის დაცული და პოლიტიკური მოტივების საფუძველზე შეიძლება მათი ჩაშლა.

რატიანის განცხადებით, მთავრობის ქმედებები მნიშვნელოვან ზიანს აყენებენ ქვეყნის პრესტიჟს, საინვესტიციო გარემოს და კერძოდ, განათლების სფეროს განვითარების პერსპექტივას.