აფხაზეთში დარწმუნებული არიან, რომ ,,კარანტინის შესახებ" რუსეთის ფედერაციის მიერ მიღებული კანონი მათ წინააღმდეგ არ არის გათვლილი.
ამის შესახებ ოკუპირებული აფხაზეთის სავაჭრო-სამრეწველო პალატის პრეზიდენტი გენადი გაგულია იუწყება.
მისი თქმით, რუსეთში 2015 წლის 1 იანვრიდან ,,კარანტინის შესახებ" კანონის ამოქმედება ფედერაციაში პროდუქციის იმპორტზე გაზრდილი მოთხოვნებით არის გამოწვეული.
,,კანონის გამკაცრება აფხაზეთთან არაფერ კავშირშია. ის ყველა იმპორტიორზე თანაბრად ვრცელდება. თითოეულ ქვეყანას საკუთარი წესები და კანონები აქვს და თუ რუსეთთან თანამშრომლობა გვინდა, ეს კანონი უნდა დავიცვათ." - განაცხადა გაგულიამ.
ამასთან, გაგულია დარწმუნებულია, რომ საზღვარზე ტვირთის თავისუფალი გადატანის შეზღუდვა პრობლემებს მაინც შექმნის.
მისი თქმით, როცა აფხაზეთიდან რუსეთში 45 ტონა მანდარინი, ათი ტონა ხურმის ჩირი, ხუთი ტონა ფეიხოა და რამდენიმე ტონა თხილია გასატანი, ამ ყველაფრის კარანტინში გატარება ძნელი იქნება.
ოკუპირებული აფხაზეთის მცენარეთა კარანტინის შესახებ სახელმწიფო ინსპექციაში აცხადებენ, რომ უწყება ახალი რეგულაციებისთვის მზადაა და საზღვარზე ტვირთის გადასატანად სერთიფიკატები სოხუმის მთავარ ოფისში ან პირდაპირ ფსოუს საბაჟო-გამშვებ პუნქტზე გაიცემა.
შეგახსნებთ, რომ 2015 წლის 1 იანვრიდან რუსეთში ევროპიდან, საქართველოდან და ყოფილი საბჭოეთის ზოგიერთი ქვეყნიდან მწვანილის, ბოსტნეულის, კარტოფილის, ხილის და სხვა მცენარეული პროდუქტების შეტანა აიკრძალა.
,,კარანტინის შესახებ" კანონის მიხედვით, სხვა ქვეყნებიდან სპეციალური ნებრათვის გარეშე, ზემოთჩამოთვლილი სახეობებიდან მხოლოდ 5 კილო ტვირთის შეტანა შეიძლება, 5 კილოზე მეტი პროდუქტის შეტანის შემთხვევაში კი სათანადო სერთიფიკატის წარდგენაა საჭირო.