საქართველოს ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა დღეს საფრანგეთის რესპუბლიკის საელჩოში გახსნილ სამძიმრის წიგნში ჩანაწერი დატოვა. ვიცე-პრემიერმა მწუხარება გამოთქვა მომხდარი ტრაგედიის გამო და საფრანგეთის მოსახლეობას მიუსამძიმრა.
„ჩვენ გამოვხატეთ თანადგომა ფრანგი ხალხისადმი. საფრანგეთის სახელმწიფო ყოველთვის იყო და არის საქართველოს ძალიან მნიშვნელოვანი პარტნიორი და მეგობარი. საფრანგეთი ყოველთვის იდგა ქართველი ხალხის გვერდით უმძიმეს წუთებში და ჩვენი ვალია, რომ გამოვხატოთ სოლიდარობა. მომხდარი ტრაგედია არ ეხება მხოლოდ საფრანგეთს, ეს არის შეტევა სიტყვის თავისუფლების წინააღმდეგ. შოკირებულები ვართ მომხდარი ტრაგედიით, ძალიან მძიმე იყო იმ კადრების ყურება, რომელიც ვნახეთ და რა თქმა უნდა, გამოვხატავთ სოლიდარობას საფრანგეთის მოსახლეობის მიმართ" - განაცხადა გიორგი კვირიკაშვილმა.
