,,ნაცმოძრაობის" დეპუტატი ლევან ბეჟაშვილი კოლეგებს საკანონმდებლო ორგანოში მომხდარი დაპირისპირების გამო ბოდიშს უხდის.
,,გოგა ხაჩიძე გამოდიოდა, მაგრამ ლორთქიფანიძეს შელაპარაკება მოუვიდა მარიამ საჯაისთან და ვთხოვე დამშვიდდი, ქალბატონია და ნორმალურად ისაუბრე-მეთქი. ისეთი არაფერი, არც საკითხის შინაარსი მახსოვს რაზე იყო გამოსვლა და არაფერი. შემდეგ ამას მოჰყვა უწმაწური სიტყვები, გაუგებრობა, რაზეც ჩემს კოლეგებს ბოდიშს ვუხდი", -განაცხადა ბეჟაშვილმა.
შეგახსენებთ, რომ პარლამენტის რიგგარეშე სხდომის მიმდინარეობისას ერთმანეთს ფიზიკურად დაუპირისპირდნენ ,,ნაცმოძრაობის" დეპუტატი ლევან ბეჟაშვილი და უმრავლესობის წევრი დავით ლორთქიფანიძე.
დაპირისპირება სხდომათა დარბაზში დაიწყო და დერეფანში გაგრძელდა, რის შემდეგ ვითარება მანდატურებმა განმუხტეს. როგორც ლორთქიფანიძემ ჟურნალისტებთან განაცხადა, "ნაციონალური მოძრაობა" ტყუილის თქმას ისევ აგრძელებს და ამის პატიება არ შეიძლება.
,,მგლის თავზე სახარებას კითხულობენ, ისეა ამ ,,ნაციონალების" საქმე . ხაჩიძე გამოდიოდა და რაღაც საცურაო აუზებზე ლაპარაკობდა, მაშინ როდესაც საცურაო აუზები და დარბაზები გაყიდეს და ქვეყანაში სპორტული ინფრასტრუქტურა გააჩანაგეს. ამასთან დაკავშირებით მივმართე ხაჩიძეს ტყულებს ნუ ლაპარაკობდა და ჩაერთო შემდეგ ბეჟაშვილი, რომელიც ძალიან ცუდად ენას ატლიკინებს"_განმარტა ლორთქიფანიძემ.
