ექსპერტი სოსო ცისკარიშვილი პრეზიდენტ გიორგი მარგველაშვილის გადაწყვეტილებას პოზიტიურად აფასებს და ,,ჯი-ეიჩ-ენთან" საუბარში მას თამამ ნაბიჯს უწოდებს. როგორც საკითხის კომენტირებისას ცისკარიშვილი აცხადებს, როცა ევროპარლამენტში ექსპრეზიდენტ მიხეილ სააკაშვილს ელოდებიან, ამ ფონზე საქართველოს ინტერესების დაცვას გიორგი მარგველაშვილზე უკეთესად ვერავინ შეძლებს.
,,პრეზიდენტის გადაწყვეტილება საუკეთესო გამოსავალია იმ უხერხულობიდან რასაც შეიძლებოდა ადგილი ჰქონოდა იმ შემთხვევაში, თუ მაღალი თანამდებობის პირები არ გამოიყენებდნენ შესაძლებლობას ევროპარლამენტში საქართველო-ევროკავშირის ასოცირების ხელშეკრულების რატიფიცირებას დასწრებოდნენ. Mმას შემდეგ რაც გავიგეთ, რომ ,,ევროპის სახალხო პარტია" ბენეფისს უმზადებს მიხეილ სააკაშვილს, რასაკვირველია, გიორგი მარგველაშვილზე უკეთ ამ შეხვედრაზე საქართველოს ინტერესების დაცვას, ალბათ, სხვა ვერ შეძლებდა. ამიტომ ეს საკმაოდ თამამი ნაბიჯია პრეზიდენტის მხრიდან. იგი არ იმალება მაშინ როდესაც სადმე, შესაძლოა, ყოფილი პრეზიდენტი აღმოჩნდეს, არა იმიტომ, რომ მის მიმართ რაიმე სიმპატიები გააჩნია, არამედ მას მეტი პასუხისმგებლობა აქვს საკუთარი სახელმწიფოს წარმოჩენის კუთხით", _ განაცხდაა ცისკარიშვილმა ,,ჯი-ეიჩ-ენთან" საუბარში.
შეგახსენებთ, რომ ევროპარლამენტი საქართველო-ევროკავშირის ასოცირების ხელშეკრულების რატიფიცირებას ხვალ მოახდენს. რატიფიცირების პროცესს პრეზიდენტი გიორგი მარგველაშვილიც დაესწრება.
