პარლამენტის საფინანსო-საბიუჯეტო კომიტეტის თავმჯდომარე, ,,თავისუფალი დემოკრატების" ერთ-ერთი ლიდერი დავით ონოფრიშვილი ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის იმ განცხადებას გამოეხმაურა, სადაც სოზარ სუბარმა ონოფრიშვილი ტყუილის ტირაჟირებაში დაადანაშაულა და განაცხადა, რომ პარლამენტის ერთ-ერთი მნიშვნელოვანი კომიტეტის თავმჯდომარე ოპოზიციონერი არ უნდა იყოს.
ონოფრიშვილის თქმით, ევროპულ ქვეყნებში საფინანსო-საბიუჯეტო კომიტეტის თავმჯდომარის პოსტზე ოპოზიციის წარმომადგენლის ყოფნა კანონით განსაზღვრულია.
"მას კომფორტულად უნდა, ალბათ, ყოფნა, რომ წარმომადგენელი იყოს უმრავლესობიდან. თუმცა, მინდა, გითხრათ, რომ ძალიან ბევრ ევროპულ ქვეყანაში, ალბათ, სოზარმა არ იცის და ბევრმაც არ იცის, საფინანსო-საბიუჯეტო კომიტეტის თავმჯდომარეები არიან ოპოზიციიდან. ასე შერჩევა იქ სპეციალურად ხდება და ასეთი ჩანაწერიც კი აქვთ კანონმდებლობაში. ახლა ჩვენთან ეს შემთხვევით მოხდა," - აცხადებს დავით ონოფრიშვილი.
საფინანსო-საბიუჯეტო კომიტეტის თავმჯდომარე ამბობს, რომ მის გადაყენებას მყარი არგუმენტები და 76 ხმა სჭირდება.
"თუ ვინმე აყენებს ჩემი გადაყენების საკითხს, მოტივაცია ვნახოთ, ამას პარლამენტის 76 ხმა სჭირდება. ეს არ არის ჩემთვის პრობლემა, მაგრამ, ვიდრე მე ვარ საფინანსო-საბიუჯეტო კომიტეტის თავმჯდომარე, მე ჩემს ფუნქციებს შევასრულებ ისე, როგორც საჭიროა," - აცხადებს ონოფრიშვილი.
დავით ონოფრიშვილმა ხაზინის მონაცემებზე დაყრდნობით სოზარ სუბარი ბიუჯეტის არასწორ ხარჯვაში დაადანაშაულა.
11 თვის მონაცემებით, დევნილთა სამიინსტრომ ბიუჯეტიდან მხოლოდ 60%-ის ათვისება შესძლო.
მასალის გამოყენების პირობები
