ინტერნეტში ახალ ზელანდიაში მცხოვრები, ინგა პავლოვას ვიდეოგანცხადება გავრცელდა. პავლოვა აცხადებს, რომ ის ბიძინა ივანიშვილის ყოფილი მეუღლა. ვიდეოგანცხადებაში პავლოვა აღნიშნავს, რომ ივანიშვილმა მასზე პარიზში 1991 წელს იქორწინა.
ინგა პავლოვა ბიძინა ივანიშვილს და სტანისლავ პოლიაკოვს, მისი პირადი დოკუმენტების უკანონო და ანგარების მიზნით გამოყენებისთვის სასამართლოში უჩივის და კომპენსაციას სთხოვს.
"ვაპირებ, მივმართო სასამართლოს. მასმედიის საშუალებების მადლიერი დავრჩები, თუ ისინი დამეხმარებიან ჩემი პოზიციის გავრცელებაში, ვინაიდან მოგეხსენებათ, მდიდარი ადამიანის წინააღმდეგ სამართლებრივი ბრძოლა ადვილი არ არის და სიცოცხლისთვისაც საშიშია", - აცხადებს პავლოვა ვიდეომიმართვაში.
მისი თქმით, ისინი 1994 წელს განქორწინდნენ და მას შემდეგ ურთიერთობა არ ჰქონიათ.
,,ამდენი წლის შემდეგ, მე მას თვალი მოვკარი ტელევიზორში, 2011 წლის ბოლოს, როცა საქართველოს პოლიტიკაში მოსვლის შესახებ განცხდება გააკეთა. ჩემთვის ეს სენსაცია იყო, რადგან ჩემი ყოფილი ქმარი არასდროს თანხმდებოდა ინტერვიუებზე და საერთოდ, ჩაკეტილ ცხოვრებას ეწეოდა." - აცხადებს პავლოვა თავის ვიდეომიმართვაში.
იმის გარდა, რომ ინგა პავლოვა ბიძინა ივანიშვილს მათი ქორწინების თაღლითური გზით გაუქმებასა და დოკუმენტების გაყალბებაში ადანაშაულებს, თავის ვიდეომიმართვაში ის საქართველოს პოლიტიკურ ცხოვრებასაც მიმოიხილავს, სადაც კოალიცია ,,ქართული ოცნების" მოქმედებებს აკრიტიკებს და ამბობს, რომ ივანიშვილმა, ჩვეულებისამებრ ყველა მოატყუა.
,,არ ვაპირებ ბიძინა ივანიშვილის მიღწევების შეფასებას, მე მასთან პირადი მოთხოვნები მაქვს. 2013 წელს ჟურნალისტმა ვლადიმერ ივანიძემ რუსეთის ფედერალურ საგადასახადო სამსახურს გადასცა ჩემი დოკუმენტები, რომელიც ადასტურებს, თითქოს მე 2004 წლიდან ივანიშვილის კუთვნილ ორ ბანკში ვმუშაობდი. რაც სიმართლეს არ შეეფერება. აქედან გამომდინარე, შეიძლება ვივარაუდო, რომ ის ჩემს დოკუმენტებს სხვადასახვა მაქინაციებისთვის იყენებდა", - განაცხადა პავლოვამ და ისიც აღნიშნა, რომ საჩივარი უკვე შეიტანა სასამართლოში და იმედი აქვს, მართლმსაჯულება ბიძინა ივანიშვილს მისი დოკუმენტების გაყალბების გამო კონპენსაციას დააკისრებს.
