ჯანმრთელობის დაცვისა და სოციალურ საკითხთა კომიტეტის სხდომაზე საკანონმდებლო წინადადებები განიხილეს. როგორც ,,ჯი-ეიჩ-ენს" საკანონმდებლო ორგანოდან აცნობეს მომხსენებლის, გია გოგიბერიძის განცხადებით, ინიციატივის მიზანი მარტოხელა დედათა სამართლებრივი სტატუსის მქონე პირთა სოციალური და სამართლებრივი დაცვის მექანიზმების გაუმჯობესებაა.
შრომის, ჯანმრთელობისა და სოციალური დაცვის მინისტრის მოადგილის, დავით ლომიძის განცხადებით, თუკი პარლამენტი ამ ინიციატივას მხარს დაუჭერს, პირველ რიგში, აღრიცხვის საკითხი უნდა მოწესრიგდეს. მისივე თქმით, წარმოდგენილი საკანონმდებლო წინადადების მხარდაჭერის შემთხვევაში, ცვლილებების შეტანა გახდება საჭირო სამოქალაქო კოდექსსა და საგადასახადო კოდექსშიც.
„ჩვენ მხარს დავუჭერთ, რომ ჩანაწერი გაიმართოს და საშემოსავლო გადასახადის კუთხით შეღავათი განისაზღვროს არა მარტოხელა დედის მიმართულებით, არამედ მარტოხელა მშობლის მიმართულებით",- აღნიშნა დავით ლომიძემ.
კომიტეტმა მარტოხელა მშობლის სტატუსის განსაზღვრას მხარი ერთხმად დაუჭირა.
