იუსტიციის მინისტრის განმარტებით, პრევენციული ზომების გატარება და კანონის გამკაცრება აუცილებელია. როგორც თეა წულუკიანმა განაცხადა, ქვეყანაში კრიმინოგენური ვითარება სტაბილურია.
„კრიმინოგენური ვითარება, როგორც ბევრჯერ ითქვა შესაბამისი უწყებებისა და ბატონი პრემიერის მიერ არის სტაბილური. დანაშაულის მთლიანად აღმოფხვრის ილუზია ნურავის ნუ ექნება, იმიტომ, რომ ყველა ქვეყანაში არსებობს დანაშაული. მთავარია ჩვენთვის და ჩვენი მთავრობისთვის, რომ როდესაც ხდება დანაშაული, ეჭვმიტანილი იყოს სწრაფად დაკავებული. როდესაც დამტკიცდება, რომ პირი არის დამნაშევე და სიცოცხლის წინააღმდეგ ჩაიდინა დანაშაული სასჯელი იყოს მკაცრი და ადექვატური. და აგრეთვე აუცილებელია პრევენციული ზომები. კანონის გამკაცრება - ემსახურება იმას, რომ ვინც შეიძლება, იმიტომ რომ უკანონოდ ატარებს იარაღს, ჩაიდინოს დანაშაული გაფრთხილდეს და ამას ჰქონდეს გადამარწმუნებელი ეფექტი", - აცხადებს თეა წულუკიანი.
შეგახსენებთ, რომ დღეს მთავრობის სხდომაზე პრემიერ-მინისტრმა შინაგან საქმეთა და იუსტიციის მინისტრებს იარაღის ტარების შესახებ კანონის გამკაცრების მიზნით საკანონმდებლო ცვლილებების შემუშავებისკენ მოუწოდა
მთავრობის მეთაურის დავალებით, მინისტრებმა შესაბამისი საკანონმდებლო ცვლილებები მაქსიმალურად მოკლე ვადებში უნდა წარადგინონ. როგორც ირაკლი ღარიბაშვილმა აღნიშნა, მისი ინიციატივით, ჯერ კიდევ შინაგან საქმეთა მინისტრობისას გამკაცრდა კანონი ცივი იარაღის ტარებასთან დაკავშირებით.
პრემიერი ქვეყანაში კრიმინოგენური ვითარების გაუარესებაზე საუბარს მიზანმიმართულ, ხელოვნურ კამპანიად აფასებს და განმარტავს, რომ კრიმინოგენური ვითარება აბსოლუტურად სტაბილურია, ხოლო სახელმწიფო აკეთებს ყველაფერს, რომ სიტუაცია იყოს მაქსიმალურად კონტროლის ქვეშ.
ირაკლი ღარიბაშვილის განცხადებით, შინაგან საქმეთა მინისტრი და უწყების ყველა თანამშრომელი მაქსიმალურად მოტივირებულია და პოლიცია 24 საათის განმავლობაში მუშაობს, რაც ფასდაუდებელი შრომაა.
„მინდა, მწუხარება გამოვთქვა ყველა იმ ოჯახის მიმართ, ვინც ოჯახის წევრები დაკარგა, მაგრამ ყველა ცივილიზებულ და ჩვენზე მეტად განვითარებულ ქვეყანაში ხდება დანაშაული. ეს არის ჩვენი ოპონენტების მიერ აწეული უსუსური მცდელობა, წარმოაჩინონ ისე, თითქოს სახელმწიფო ვერ ან არ ებრძვის კრიმინალს ეფექტურად. ისინი ცდილობენ, საზოგადოებაში გააჩინონ განცდა, რომ გაუარესებულია კრიმინოგენური ვითარება", - განაცხადა პრემიერმა.
მთავრობის მეთაურის განმარტებით, ხელისუფლებამ დაიწყო უკომპრომისო ბრძოლა კრიმინალის წინააღმდეგ, იმ ფონზე, როდესაც ამნისტიით გაათავისუფლა 17 ათასი პატიმარი. როგორც პრემიერმა აღნიშნა, მათი ბედი აბსოლუტურად გაურკვეველი იყო, ისინი იყვნენ წამებისა და არაადამიანური მოპყრობის მსხვერპლი.
„ჩვენ მათ მივეცით რესოციალიზაციის და რეინტეგრაციის შანსი. ბევრმა მათგანმა ეს დააფასა, ხოლო, ვინც ვერ დააფასა, გიორგი მღებრიშვილის უწყებაში არიან მოკალათებული", - აღნიშნა პრემიერმა.
ირაკლი ღარიბაშვილის ინფორმაციით, ალექსანდრე ჭიკაიძის უწყებამ შეიმუშავა პრევენციულ ღონისძიებათა კომპლექსური გეგმა და მისი დავალებით მაქსიმალურად გამკაცრდება ბრძოლა იარაღის უკანონოდ ტარებასთან დაკავშირებით. როგორც პრემიერმა აღნიშნა, მთავრობა მაქსიმალურად ცდილობს, ერთის მხრივ არ დაარღვიოს ადამიანის უფლებები და მეორეს მხრივ, ეფექტურად იბრძოლოს კრიმინალის წინააღმდეგ.
„ყველაზე ადვილია კანონდარღვევა და ძალადობა, მაგრამ ის საქმიანობა, რასაც ბატონი ჭიკაიძე აწარმოებს, დასაფასებელია. ისინი 24 საათის განმავლობაში ებრძვიან კრიმინალს და ამავდროულად ცდილობენ, არ დაარღვიონ ადამიანის უფლებები. მოგიწოდებთ, მაქსიმალურად გაამკაცროთ ბრძოლა აღნიშნული დანაშაულის წინააღმდეგ. ვიცი, რომ გაქვთ კონკრეტული გეგმა და ამას ეფექტურად გაართმევთ თავს", - მიმართა პრემიერმა შინაგან საქმეთა მინისტრს.
