საგარეო საქმეთა მინისტრის მაია ფანჯიკიძის განცხადებით, ტრადიციულ ,,ამბასადორიალი" მნიშვნელოვანი მოვლენაა როგორც საგარეო უწყების ცხოვრებაში, ასევე საქართველოს ხელისუფლებისთვის. როგორც ჟურნალისტებთან ფანჯიკიძემ განაცხადა ,,ამბასადორიალზე" ყველა უწყების ხელმძღვანელთან ერთად გაანალიზებენ ყველა იმ საკითხს რომელიც მნიშვნელოვანია, როგორც საშინაო, ისე საგარეო პოლიტიკისთვის.
,,დღეს იწყება ყოველწლიური ,,ამბასადორიალი" და საქართველოში ჩამოსულია ჩვენი ყველა ელჩი. ასევე ,,ამბასადორიალის" გახსნას ესწრებიან თბილისში აკრედიტებული დიპლომატიური კორპუსის აკრედიტებული წარმომადგენელი. რაც მთავარია ამბასადორიალის გახსნაზე იმყოფებიან პრეზიდენტი, პრემიერი და უზენაესი სასამართლოს თავმჯდომარე, მინისტრთა კაბინეტის, პარლამენტის წევრები. ეს არის ძალიან მნიშვნელოვანი მოვლენა საგარეო საქმეთა სამინისტროს ცხოვრებაში, მაგრამ ვფიქრობ, საქართველოს ხელისუფლებისთვისაც. ამიტომ დიდი ინტერესით ველოდებით ,,ამბასადორიალის" ოთხ დღეს, როცა გვექნება საშუალება ყველა უწყების ხელმძღვანელთან ერთად გავიაროთ ყველა საკითხი რომელიც მნიშვნელოვანია, როგორც საშინაო, ისე საგარეო პოლიტიკისთვის", _განაცხადა ფანჯიკიძემ.
შეგახსენებთ, რომ დღეს 4 აგვისტოდან 7 აგვისტოს ჩათვლით თბილისში, სასტუმრო „ქორთიარდ მარიოტში," ტარდება საზღვარგარეთ საქართველოს დიპლომატიური წარმომადგენლობების ხელმძღვანელთა ყოველწლიური შეხვედრა - ამბასადორიალი.
ყოველწლიურ შეკრებაზე სამინისტროს ხელმძღვანელობა და საზღვარგარეთ საქართველოს დიპლომატიური წარმომადგენლები გაწეული საქმიანობას შეფასებენ და მომავალი წლის სამუშაო გეგმებს დასახვენ. ,,ამბასადორიალს" საქართველოს საკანონმდებლო, აღმასრულებელი და სასამართლო ხელისუფლების ხელმძღვანელები, მათ შორის, საქართველოს პრეზიდენტი, პრემიერ-მინისტრი და პარლამენტის თავმჯდომარე, მინისტრთა კაბინეტი და პარლამენტის ხელმძღვანელი პირები ესწრებიან.
ამბასადორიალის გახსნაზე ასევე იმყოფებიან საქართველოში აკრედიტებული უცხო ქვეყნების დიპლომატიური კორპუსი, საგარეო საქმეთა სამინისტროს ლევან მიქელაძის სახელობის სასწავლო ცენტრის ხელმძღვანელი და სუამ-ის გენერალური მდივანი.
ამბასადორიალს მისასალმებელი სიტყვით გახსნეს საქართველოს პრეზიდენტმა, პრემიერ-მინისტრმა, და საგარეო საქმეთა მინისტრმა.
ამბასადორიალი ოთხ დღეს გასტანს. სამუშაო სესიებზე მომხსენებლის სტატუსით, მოწვეულნი არიან საქართველოს აღმასრულებელი ხელისუფლების წარმომადგენლები, ასევე დამოუკიდებელი უწყებების ხელმძღვანელი პირები საკანონმდებლო ორგანოს წარმომადგენლები. ისინი თემატურ სესიებზე დიპლომატებს მიაწვდიან ინფორმაციას უწყებებში მიმდინარე რეფორმებზე, პროექტებსა და სამომავლო გეგმებზე, უპასუხებენ დიპლომატიური წარმომადგენლობების ხელმძღვანელთა შეკითხვებს და განიხილავენ საგარეო უწყებასთან შემდგომი თანამშრომლობის კონკრეტულ მიმართულებებს. დაგეგმილია ასევე საქართველოს დიპლომატიური კორპუსის შეხვედრა სამოქალაქო სექტორის წარმომადგენლებთან.
ამბასადორიალის დასრულების შემდეგ (8-9 აგვისტოს) საგარეო საქმეთა მინისტრი, მაია ფანჯიკიძე პირადად შეხვდება საზვარგარეთ საქართველოს დიპლომატიური წარმომადგენლობების ყველა ხელმძღვანელს. (შეგახსენებთ დღეისათვის საზღვარგარეთ ფუნქციონირებს საქართველოს 63 საელჩო და მისია, 6 გენერალური და 3 საკონსულო სამსახური).
აღსანიშნავია, რომ ამბასადორიალი საქართველოში ყოველწლიურად სექტემბრის პირველ კვირაში ტარდებოდა. წელს ამბასადორიალის ჩატარება დაიგეგმა აგვისტოს თვეში, რათა სექტემბრში, სამუშაო წლის დასაწყისისთვის საზღვარგარეთ საქართველოს თითოეულ დიპლომატიურ წარმომადგენლობას უკვე შემუშავებული ჰქონდეს წლის სამუშაო გეგმა და მიზნები.
ამბასადორიალის პროგრამის პარალელურად განხორციელდება ასევე სპეციალური პროგრამა საზღვარგარეთ საქართველოს დიპლომატიური წარმომადგენლობების ხელმძღვანელთა მეუღლეებისათვის.
