თავდაცვის მინისტრი ირაკლი ალასანია ამერიკელი სენატორების განცხადებას გამოეხმაურა და მოუწოდა, რომ პატივი სცენ საქართველოს კანონებს.
,,მე რა თქმა უნდა, დიდი პატივს ვცემ სენატორებს, ჩემს მეგობრებს, ისინი საქართველოს მეგობრები არიან. მესმის, რომ მათ გარკვეული შეშფოთება მაქვთ, მაგრამ მართლმსაჯულებას დაელოდნონ და პატივი სცენ საქართველოს კანონებს", - განაცხადა ალასანიამ.
ამერიკელი სენატორები შეშფოთებას გამოთქვამენ ყოფილი პრეზიდენტის მიხეილ სააკაშვილისა და ყოფილი მაღალჩინოსნების წინააღმდეგ წაყენებული ბრალდებების გამო. როგორც სენატორების ჯონ მაკკეინის, ბენ კარდინის, ჯინ შაჰინის და ჯიმ რიშის განცხადებაშია აღნიშნული "მართლმსაჯულების აღსრულება არ უნდა გახდეს პოლიტიკური შურისძიების იარაღი.
,, ჩვენ ვთხოვეთ პრემიერ ღარიბაშვილს და სხვა ქართველ ლიდერებს, კონცენტრირება მოეხდინათ ქვეყნის მომავალზე და არა წარსულზე, იმისთვის, რომ დახმარებოდნენ ქვეყანას წინსვლაში.ქართველმა ლიდერებმა კარგად უნდა იფიქრონ იმ მიმართულებაზე, საითაც ქვეყანა მიჰყავთ. დღევანდელი და სხვა მსგავსი ქმედებები იწვევს არასასურველ გამოწვევებს ჩვენი ურთიერთობის წინსვლის საკითხში"- ნათქვამია ღია წერილში.
პროკურატურის ინფორმაციით, გუშინ მთავარი პროკურატურის მიერ გამოტანილი იქნა დადგენილება საქართველოს ყოფილი პრეზიდენტის მიხეილ სააკაშვილის ბრალდებულის სახით სისხლის სამართლის პასუხისგებაში მიცემის შესახებ. საქმე ეხება 2007 წლის 07 ნოემბერს, მომიტინგეთა მასობრივად დარბევას, ტელეკომპანია "იმედში" შეჭრას და არკადი პატარკაციშვილის კუთვნილი ქონების დანაშაულებრივად ხელში ჩაგდებას. მიხეილ სააკაშვილთან ერთად, ბრალდების შესახებ დადგენილებები იქნა გამოტანილი: შინაგან საქმეთა ყოფილი მინისტრის ივანე მერაბიშვილის, ყოფილი გენერალური პროკურორის ზურაბ ადეიშვილის, თავდაცვის ყოფილი მინისტრის დავით კეზერაშვილის და თბილისის ყოფილი მერის გიორგი უგულავას მიმართ.
