18 ივლისს, ქუთაისში, საქართველოს პარლამენტში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა და ევროკომისარმა გაფართოებისა და სამეზობლო პოლიტიკის საკითხებში შტეფან ფულემ ხელს მოაწერეს საქართველოსა და ევროკავშირს შორის თანამშრომლობის ორ დოკუმენტს: საქართველოსა და ევროკავშირს შორის საქართველოსთვის სტრატეგიული დახმარების ჩარჩო პროგრამის (Single Support Framework - SSF) ურთიერთგაგების მემორანდუმს და 2012 წლის სამოქმედო გეგმის სოფლის მეურნეობის განვითარების სექტორული პოლიტიკის მხარდაჭერის პროგრამის საფინანსო შეთანხმების ცვლილებების ოქმს.
საქართველოსა და ევროკავშირს შორის საქართველოსთვის სტრატეგიული დახმარების ჩარჩო პროგრამის (Single Support Framework - SSF) ურთიერთგაგების მემორანდუმი 2014-2017 წლებში საქართველოსთვის ევროკავშირის დახმარების ძირითად პრიორიტეტულ მიმართულებებს და დახმარების ოდენობას განსაზღვრავს. დახმარება მიმართული იქნება საქართველოს მთავრობის მხარდაჭერისკენ დემოკრატიული რეფორმების განხორციელების პროცესში, რისთვისაც ევროკავშირი ვალდებულებას იღებს 2014-2017 წლებში საქართველოს გამოუყოს ფინანსური დახმარება 330-დან 410 მილიონი ევროს ფარგლებში.
სტრატეგიული დახმარების ჩარჩო პროგრამა, ზოგადად, გულისხმობს საქართველოს მხარდაჭერას ევროკავშირთან გაფორმებული შეთანხმებების (AA, DCFTA, VLAP) ფარგლებში ნაკისრი ვალდებულებების შესრულებაში.
ამ დოკუმენტით, საქართველო და ევროკავშირი თანხმდებიან, რომ რეფორმების გატარების პროცესში ითანამშრომლებენ შემდეგ პრიორიტეტულ სექტორებში: საჯარო სამსახურის რეფორმა, სოფლის და სოფლის მეურნეობის განვითარება, მართლმსაჯულების სექტორის გაძლიერება, საქართველო ევროკავშირის შეთანხმებების (AA, DCFTA, VLAP) განხორციელების ხელშეწყობა.
2012 წლის სამოქმედო გეგმის სოფლის მეურნეობის განვითარების სექტორული პოლიტიკის მხარდაჭერის პროგრამის საფინანსო შეთანხმების ცვლილებების ოქმი წარმოადგენს ევროკავშირის დახმარების 2012 წლის სამოქმედო გეგმის ფარგლებში მიმდინარე სოფლის მეურნეობის განვითარების სექტორული პოლიტიკის მხარდაჭერის 40 მილიონ ევროიან პროგრამაზე დამატებით 12 მილიონი ევროს გამოყოფას, რომლის ძირითადი მიზანია საქართველოში საკვები პროდუქტების წარმოების ზრდის ხელშეწყობა და სოფლად სიღარიბის დაძლევა. აღნიშნული პროგრამა ხელს შეუწყობს „სოფლის მეურნეობის სექტორის განვითარების ეროვნული სტრატეგიის" განხორციელებას, მცირე ფერმერთა კოოპერატივების შექმნას და სასოფლო-სამეურნეო ორგანიზაციების გაძლიერებას.
12 მილიონი ევროდან 6.5 მილიონი ევრო, საბიუჯეტო დახმარების სახით, 2016 წელს ერთ ტრანშად პირდაპირ სახელმწიფო ბიუჯეტში იქნება მიმართული, მას შემდეგ, რაც საქართველო შეასრულებს დოკუმენტში ასახულ წლიურ გეგმებს და ევროკავშირი შეაფასებს წლიური გეგმის განხორციელების მიმდინარეობას.
5,5 მილიონი ევრო განსაზღვრულია საექსპერტო დახმარების და საგრანტო პროექტებისთვის.
