პრემიერ-მინისტრი ირაკლი ღარიბაშვილი გუშინ თბილისის მერობის კანდიდატებს შორის გამართულ დებატებს ეხმიანება და აცხადებს, რომ კოალიცია ,,ქართული ოცნების" თბილისის მერობის კანდიდატმა დავით ნარმანიამ კონკურენტი ნიკა მელია ღირსეულად დაამარცხა.
,,გუშინდელ დებატებს რაც შეეხება, მიმაჩნია, რომ ნარმანიამ ღირსეულად დაამარცხა თავისი კონკურენტი ნიკა მელია. მიმაჩნია, რომ არაფერი პრობლემა არ იქნება თბილისში", _განაცხადა ღარიბაშვილმა.
შეგახსენებთ, რომ თბილისის მერობის კანდიდატებს დავით ნარამანიასა და ნიკა მელიას შორის დებატები გუშინ ოთხ ეტაპად წარიმართა.
კანდიდატებს საარჩევნო პროგრამის წარსადგენად სამ-სამი წუთი მიეცათ, რის შემდეგ ჟურნალისტების კითხვებს უპასუხეს.
მერობის კანდიდატებს ერთმანეთისთვის კითხვის დასმის საშუალებაც ჰქონდათ, ხოლო პასუხის გასაცემად თითო-თითო წუთი.
დავით ნარმანიამ ნიკა მელიას ბუკლეტი გადასცა, რომელშიც ძველი და ახალი ხელისუფლების მიერ გაკეთებული პროგრამების შესახებ იყო საუბარი.
ნიკა მელიამ კი ოპონენტს ის სია მისცა, რომელშიც, მისი თქმით, კოალიციის მიერ შეუსრულებელი დაპირებების ჩამონათვალია.
დებატები ,,შერატონ მეტეხი პალასში" გაიმართა. არჩევნების მეორე ტური 12 ივლისს შედგება.
