პოლიტოლოგი რამაზ საყვარელიძე ,,ჯი-ეიჩ-ენთან" საუბარში გუშინ თბილისის მერობის კანდიდატებს შორის გამართულ დებატებს პოზიტიურად აფასებს, თუმცა აცხადებს, რომ დებატების აღნიშნულის ფორმა განვითარებას საჭიროებს.
მისივე განცხადებით, გუშინდელი დებატების დროს კარგად გამოჩნდა, რომ კოალიცია ,,ქართული ოცნების" მერობის კანდიდატი დავით ნარმანია უფრო ქალაქის გენერალური გეგმის შედგენისა და იქიდან გამომდინარე მოქმედების მომხრეა, ,,ნაცმოძრაობის" მერობის კანდიდატი ნიკა მელია კი უფრო ფრაგმენტულ პროგრამებზეა ორიენტირებული.
,,დებატები შედარებით ახალი ხილია, მიუხედავად ამისა, პრინციპში ფორმა უცხოეთში რაც მინახავს ანალოგიური იყო. თვითონ დებატების შინაარსი, დასმული კითხვებითა და პასუხებით პრესკონფერენციისგან განსხვავებული იყო თუმცა მის ელემენტებს, გარკვეულწილად, ატარებდა. Oმერობის ორივე კანდიდატმა თავისი პროგრამების ფარგლებში ისაუბრა. თუმცა კარგად გამოჩნდა განსხვავება მათ პოზიციებსა და პროგრამებში. დავით ნარმანია უფრო მასშტაბური გეგმების მქონეა_ქალაქის გენერალური გეგმისა და იქიდან გამომდინარე მოქმედების მომხრეა, ნიკა მელია უფრო ფრაგმენტებზეა გადართული, მზის ენერგიის საშუალებით სახლების გათბობა, იგივე ტრანსპორტის პრობლემის მოგვარება, რომლისთვისაც თბილისი მერია, მე მგონი, მეტისმეტად მსხვილი სტრუქტურაა და უფრო იოლად შეიძლება მსგავსი ტიპის პრობლემების გადაჭრა", _განაცხადა საყვარელიძემ ,,ჯი-ეიჩ-ენთან" საუბარში.
შეგახსენებთ, რომ თბილისის მერობის კანდიდატებს დავით ნარამანიასა და ნიკა მელიას შორის დებატები გუშინ ოთხ ეტაპად წარიმართა.
კანდიდატებს საარჩევნო პროგრამის წარსადგენად სამ-სამი წუთი მიეცათ, რის შემდეგ ჟურნალისტების კითხვებს უპასუხეს.
მერობის კანდიდატებს ერთმანეთისთვის კითხვის დასმის საშუალებაც ჰქონდათ, ხოლო პასუხის გასაცემად თითო-თითო წუთი.
დავით ნარმანიამ ნიკა მელიას ბუკლეტი გადასცა, რომელშიც ძველი და ახალი ხელისუფლების მიერ გაკეთებული პროგრამების შესახებ იყო საუბარი.
ნიკა მელიამ კი ოპონენტს ის სია მისცა, რომელშიც, მისი თქმით, კოალიციის მიერ შეუსრულებელი დაპირებების ჩამონათვალია.
დებატები ,,შერატონ მეტეხი პალასში" გაიმართა.
არჩევნების მეორე ტური 12 ივლისს შედგება.
