ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი ,,ჯი-ეიჩ-ენთან" საუბარში სტრასბურგის სასამართლოს გადაწყვეტილებას აფასებს და აცხადებს, რომ ეს არის სამართლიანი გადაწყვეტილება.
მისივე განცხადებით, აღნიშნულის შედეგის დასადებად ბევრი შრომა გასწიეს ქართველმა იურისტებმა, იუსტიციის სამინისტრომ.
,,სტრასბურგის სასამართლოს გადაწყვეტილებას მხოლოდ და მხოლოდ მივესალმები, რადგან სამართლიანი გადაწყვეტილებაა. ამისთვის ძალიან ბევრი შრომა გასწიეს ჩვენმა იურისტებმა. ამ მიმართულებით იუსტიციის სამინისტროს დიდი დამსახურებაა და რეალურად უნდა აღინიშნოს ყველას როლი და ყველასა დამსახურება. Aამიტომ მინდა მადლიერება გამოვხატო ყველას მიმართ განურჩევლად რომელ წლებში მუშაობდა ამ კონკრეტულ საკითხზე. ეს არის გამარჯვება, წარმატება და სამართლიანობის აღდგენა", _განაცხადა ,,ჯი-ეიჩ-ენთან" საუბარში პეტრიაშვილმა.
სტრასბურგის სასამართლომ ეთნიკური ქართველების დეპორტაციის გამო რუსეთის წინააღმდეგ საქართველოს საჩივარზე გადაწყვეტილება საქართველოს სასარგებლოდ გამოიტანა. სტრასბურგის სასამართლოს გადაწყვეტილებით, რუსეთმა საქართველოს წინააღმდეგ ადამიანის უფლებათა ევროკონვენციის ექვსი მუხლი დაარღვია. სტრასბურგის სასამართლოს ინფორმაციით, რუსეთმა დაარღვია ევროპის ადამიანთა უფლებების კონვენციის მეოთხე მუხლი, რომელიც კრძალავს უცხო ქვეყნის მოქალაქეების კოლექტიურ დეპორტაციას, მე-5 მუხლის 1-ლი პარაგრაფი, მე-5 მუხლის მე-4 პარაგრაფი, მე-3 მუხლი და მე-13 მუხლი.
სასამართლოს გადაწყვეტილებით, რუსეთში ადგილი ჰქონდა ქართველების დევნის კოორდინირებულ პრაქტიკას. რაც შეეხება კომპენსაციის ოდენობას, მხარეები ამაზე 12 თვის ვადაში უნდა შეთანხმდნენ.
საქართველოს მთავრობამ სტრასბურგის სასამართლოში რუსეთის წინააღმდეგ სახელმწიფოთაშორისი საჩივარი 2007 წლის 26 მარტს შეიტანა. საჩივარი უკავშირდება რუსეთის მიერ 2006 წლის შემოდგომაზე გატარებულ სადამსჯელო პოლიტიკას, რომელსაც რუსეთის ფედერაციის ტერიტორიაზე მცხოვრები ეთნიკური ქართველების დევნა, შევიწროება და ქვეყნიდან მათი მასობრივი დეპორტაცია მოჰყვა.
საჩივარში საილუსტრაციოდ მოყვანილია 130-მდე ქართველის ინდივიდუალური შემთხვევა. 2011 წლის იანვარ-თებერვალში ადამიანის უფლებათა ევროპული სასამართლოს დიდი პალატის 17 მოსამართლის წინაშე დაიკითხნენ მოწმეები, რომლის დროსაც მხარეებმა 10-10 მოწმე წარმოადგინეს. ბოლო საჯარო სხდომა სასამართლომ 2012 წლის 13 ივნისს გამართა და ამის შემდეგ პროცედურა დაიხურა.
საქართველოს საჩივარი ემყარება ადამიანის უფლებათა ევროპული კონვენციისა და მისი დამატებითი ოქმების მუხლებს, რომელიც გულისხმობს წამების, არაადამიანური ან ღირსების შემლახველი მოპყრობის ან დასჯის აკრძალვას, პირადი და ოჯახური ცხოვრების დაცულობის უფლებას, სამართლებრივი დაცვის ეფექტიანი საშუალების უფლებას, დისკრიმინაციის აკრძალვას, საკუთრების დაცვას, უცხოელთა კოლექტიური გაძევების აკრძალვას. საქართველო ითხოვს ამ უფლებების დარღვევის აღიარებას და დაზარალებულთათვის მორალური და მატერიალური კომპენსაციის მინიჭებას.
