„ბოლო რვა წლის განმავლობაში, საქართველოს თავდაცვისა და უსაფრთხოების კონფერენციამ ცხადყო, რომ წარმოადგენს რეგიონის საერთაშორისო დონის უნიკალურ ფორუმს, სადაც განიხილება საკითხები ევროატლანტიკური უსაფრთხოებისა და სტაბილურობის შესახებ"- აღნიშნულის შესახებ განცხადება თავდაცვის მინისტრმა ირაკლი ალასანიამ, ბათუმში, საქართველოს თავდაცვისა და უსაფრთხოების კონფერენციაზე (GDSC) სიტყვით გამოსვლისას გააკეთა.
თავდაცვის უწყების ხელმძღვანელმა სტუმრებს კონფერენციაში მონაწილეობისა და ქვეყნის ევრო-ატლანტიკური მისწრაფებების მხარდაჭერისთვის მადლობა გადაუხადა. ირაკლი ალასანიამ გამოსვლაში ყურადღება გაამახვილა ევროპის უსაფრთხოების გამოწვევებზე, საქართველოსა და ევროკავშირს შორის ასოცირების ხელშეკრულების გაფორმების მნიშვნელობაზე, თავდაცვის სფეროში განხორციელებულ რეფორმებზე, საერთაშორისო მისიებში საქართველოს მონაწილეობასა და უკრაინის კრიზისზე.
„რა თქმა უნდა, კონფერენციის დღის წესრიგის ერთი გადახედვაც საკმარისია, რომ მივხვდეთ, რამდენად მჭიდროდ არის გადაჯაჭვული კონფერენციაზე განსახილველი საკითხები აქტუალურ საერთაშორისო თემატიკასთან, რაც ევროატლანტიკური უსაფრთხოების არქიტექტურას გამოწვევების წინაშე აყენებს.
ჩვენი ბოლო შეხვედრის შემდეგ ზუსტად ერთი წელი გავიდა. ამ წლის განმავლობაში ბევრი რამ შეიცვალა - პირველ რიგში, კი, ევროპის უსაფრთხოების პარადიგმა.
რუსეთის ფედერაციის ღია აგრესიამ უკრაინის მიმართ, რასაც შედეგად ყირიმის უკანონო ანექსია მოყვა, გამოიწვია საბოტაჟი ქვეყნაში და უარყოფითი გავლენა იქონია როგორც ქვეყანაზე, ასევე რეგიონზე და მის ფარგლებს გარეთაც. აღნიშნული ქმედება უგულებელყოფს საერთაშორისო სამართლის კანონებსა და ნორმებს და საფრთხეს უქმნის ევროატლანტიკური უსაფრთხოების არქიტექტურას.
ყირიმი არ წარმოადგენს, უკანონო საზღვრების გავლების, ოჯახის წევრების ერთმანეთისგან განცალკევებისა და მათი საცხოვრებელი ადგილებისგან მოწყვეტის, ცალკეულ პრეცენდენტს. მე გესაუბრებით ჩემი ქვეყნის 20%-ზე, რომელიც ოკუპირებულია რუსეთის ფედერაციის მიერ.
ევროპაში ტერიტორიის ახლებური დაყოფის მცდელობა, მნიშვნელოვან გავლენას იქონიებს ევროპისა და ამერიკის შეერთებული შტატების ეროვნულ ინტერსებზე, რაც საჭიროებს უფრო მრავლისმომცველ ტრანსატლანტიკურ პოლიტიკას.
მე მივესალმები ალიანსის ერთობას და იმ ნაბიჯებს, რომლებიც გადაიდგა აღნიშნული საფრთხეების საპასუხოდ, სანქციების დაკისრებისა და კოლექტიური უსაფრთხოების გაზრდის თვალსაზრისით. თქვენი ერთობა და თავდაუზოგავი ძალისხმევა, ევროპის უსაფრთხოების განმტკიცებისათვის განხორციელებული ღონისძიებები, მნიშვნელოვან გამხნევებას წარმოადგენს ჩვენი ქვეყნისათვის.
სწორედ ამ მომენტში, როდესაც თქვენს წინაშე სიტყვით გამოვდივარ, ქართული დელეგაცია პრემიერ მინისტრის ირაკლი ღარიბაშვილის მეთაურობით ხელს აწერს ისტორიულ შეთანხმებას ევროკავშირთან, რაც ევროკავშირში საქართველოს ინტეგრაციის პროცესის უდიდეს ბიძგს წარმოადგენს. მნიშვნელოვანი ღონისძიებები გატარდა აღნიშნული მიზნის მისაღწევად, რაც იგივე სულისკვეთებით გაგრძელდება ხელმოწერის შემდეგაც.
ჩვენი ერთობლივი ძალისხმევის შედეგად საქართველო დემოკრატიული თვალსაზრისით უფრო მომწიფებულია.
მთავრობას და უფრო მეტად თავად საზოგადოებას ერთობლივად შეაქვთ წვლილი დემოკრატიული კონსოლიდაციის საქმეში, რაც ჩვენი აზრით უმთავრესია საქართველოს ნატოსა და ევროკავშირში გაწევრიანების პროცესში.
ვინაიდან თავდაცვის სამინისტროს აქვს წამყვანი როლი ნატოში გაწევრიანების პროცესში, მთელი ჩვენი ძალისხმევა მიმართულია ნატოსთან თავსებადობისა და თავდაცვის შესაძლებლობების გაძლიერებისაკენ.
მე ამაყი ვარ, რომ საქართველოს პროგრესი თავდაცვის ტრანსფორმაციაში შესაბამისად დაფასებულია ნატო-ს მხრიდან. უფრო მეტიც, ნატო-მ მოუწოდა საქართველოს, გაუზიაროს მისი გამოცდილება საუკეთესო პრაქტიკა პარტნიორ ქვეყნებს. ჩვენ ამას გავაკეთებთ დიდი ენთუზიაზმითა და ენერგიით.
ძვირფასო მეგობრებო, ჩვენი ერთიანი ძალისხმევით, დღეს საქართველოს შეიარაღებული ძალები გამოირჩევა ნატო-სთან თავსებადობის უმაღლესი დონით, იმასთან შედარებით, რაც აქამდე ქონდათ.
12 000-ზე მეტმა საქართველოს სამხედრო მოსამსახურემ გაიარა ავღანეთში, საერთაშორისო უსაფრთხოების მხარდამჭერი ძალების გადასროლისწინა მომზადება შეერთებული შტატების საზღვაო ქვეითთა კორპუსის ზედამხედველობით და მონაწილეობა მიიღო ავღანეთში, საერთაშორისო უსაფრთხოების მხარდამჭერ მისიაში.
ასპირანტ ქვეყანასა და სანდო პარტნიორად ყოფნასთან ერთად საქართველო შეუქცევადად აგრძელებს წვლილის შეტანას გლობალურ მშვიდობასა და უსაფრთხოებაში ავღანეთში და ახლა უკვე ცენტრალურ აფრიკაშიც ძალების განთავსებით. ჩვენ ერთმნიშვნელოვნად გავაგრძელებთ გლობალურ სიმშვიდესა და უსაფრთხოებაში წვლილის შეტანას 2014 წლის შემდეგაც.
საქართველოს პროგრესის გათვალისწინებით, რაც დადებითად იქნა შეფასებული ალიანსის მიერ, უელსის სამიტზე ქართველ ხალხს აქვს მოლოდინი, რომ ალიანსი გადადგამს შემდგომ ნაბიჯს საქართველოს ნატოში ინტეგრაციის პროცესში. დარწმუნებული ვარ, რომ აღნიშნული საკითხი განხილული იქნება კონფერენციის განმავლობაში.
ამ წლის თავდაცვისა და უსაფრთხოების კონფერენცია შეეხება სექტემბერში დაგეგმილ სამიტს და უკრაინის კრიზისთან დაკავშირებულ საკითხებს, თუმცა, კონფერენცია არ არის შეზღუდული მხოლოდ ხსენებული საკითხებით. ღონისძიებაზე განიხილება სხვა მნიშვნელოვანი საკითხებიც, როგორებიცაა ევროპის უსაფრთხოება, ევროკავშირის ჩართულობა მის საზღვრებს მიღმა, ასევე შავი ზღვის რეგიონის უსაფრთხოების კონტექსტი და ნატოს გადამწყვეტი მხარდაჭერის ოპერაცია.
მე დარწმუნებული ვარ, რომ მიმდინარე წლის თავდაცვისა და უსაფრთხოების კონფერენცია თავის წვლილს შეიტანს მიმდინარე დისკუსიაში, როგორ გავაძლიეროთ ევროატლანტიკური უსაფრთხოების არქიტექტურა და მიზანმიმართულად განვახორციელოთ ჩვენი სტრატეგიული მიზანი - თავისუფალი და მშვიდობიანი ევროპა.
მაქვს სურვილი, კიდევ ერთხელ გამოვხატო ჩემი პატივისცემა საპატიო მომხსენებლების, მოდერატორებისა და კონფერენციის მონაწილეების მიმართ"- აღნიშლა ალასანიამ.
საერთაშორისო ფორუმის მონაწილეებს სიტყვით მიმართა საქართველოს პრეზიდენტმა გიორგი მარგველაშვილმა.
ფორუმის მონაწილეები ორი დღის განმავლობაში ისეთ მნიშვნელოვან საკითხებს განიხილავენ, როგორიცააა ევრო-ატლანტიკური უსაფრთხოება, ნატოს გაფართოება, დაგეგმილი სამიტი უელსში, საქართველოს თავდაცვის სფეროში მიმდინარე რეფორმები, ISAF-ის ოპერაცია და შავი ზღვის რეგიონის სტრატეგიული მნიშვნელობა.
თავდაცვის სამინისტროს ორგანიზებით თავდაცვისა და უსაფრთხოების კონფერენცია მეცხრედ ტარდება. კონფერენციის მიზანია საუკეთესო პრაქტიკის გაზიარება და თანამშრომლობის გაღრმავება თავდაცვისა და უსაფრთხოების სფეროში. საქართველოს თავდაცვის კონფერენცია ჩამოყალიბდა უსაფრთხოების პოლიტიკის ფორუმად სამხრეთ კავკასიაში, რომელიც მიმოიხილავს როგორც უსაფრთხოების, ასევე თავდაცვის სფეროს მიმდინარე და სამომავლო გამოწვევებს და მათი დაძლევის გზებს, როგორც რეგიონული ასევე, საერთაშორისო კუთხით.
მოწვეულ სტუმრებს შორის არიან ლატვიის თავდაცვის მინისტრი რაიმონდ ვეიონისი, ესტონეთის თავდაცვის მინისტრი სვენ მიკსერი, გაერთიანებული სამეფოს მინისტრი საერთაშორისო სტრატეგიის საკითხებში ენდრიუ მურისონი, პოლონელი სენატორი ბოგდან კლიხი, მაღალი რანგის პოლიტიკოსები სხვადასხვა ქვეყნებიდან და საერთაშორისო ანალიტიკური ცენტრების წარმომადგენლები.
კონფერენციაში მონაწილეობას იღებენ საქართველოს საკანონმდებლო და აღმასრულებელი ხელისუფლების წევრები, საქართველოში აკრედიტებული დიპლომატიური კორპუსის, ასევე არასამთავრობო და საერთაშორისო ორგანიზაციების წარმომადგენლები.
კონფერენციას საქართველოს პრემიერ-მინისტრი ირაკლი ღარიბაშვილი დახურავს.
