რესპუბლიკურმა პარტიამ ახალგორიდან დევნილების უფლებების დაცვის მიზნით სასამართლოში საჩივარი შეიტანა.
როგორც პარტიის ერთ-ერთმა ლიდერმა თინა ხიდაშელმა დღეს გამართულ პრესკონფერენციაზე განაცხადა, ახალგორიდან დევნილ 1400-ზე მეტ მოქალაქეს ამ დრომდე არ მიუღია სახელმწიფოსგან დაპირებული კომპენსაცია და დევნილის სტატუსი.
"როგორც ყველა სხვა დევნილს, ახალგორიდან დევნილებსაც ეკუთვნით კომპენსაცია დევნილობაში ყოფნის გამო. თუმცა, ისინი რატომღაც განსაკუთრებულ კატეგორიად განიხილა ჩვენმა ხელისუფლებამ და დაახლოებით 1 437 ადამიანს დღემდე არ მიუღია არავითარი კომპენსაცია და არ შეხებია კანონის სხვა მოთხოვნები", - განაცხადა ხიდაშელმა.
მისივე განმარტებით, ახალგორელმა დევნილებმა რესპუბლიკურ პარტიას დახმარება თავად სთხოვეს.
