გარემოს დაცვისა და ბუნებრივი რესურსების მინისტრი გოგა ხაჩიძე ქობულეთის რაიონს სტუმრობდა, სადაც შავი ზღვის სანაპირო ზოლში დაგეგმილ ნაპირსამაგრ სამუშაოებს გაეცნო.
ხაჩიძის განცხადებით, ქალაქ ქობულეთში ზღვის სანაპირო ზოლში მდებარე საფეხურებიან ნაპირდამცავ კედელს დაზიანებული აქვს საძირკველი, რის შედეგადაც საფრთხე ემუქრება თვით კედელსა და თამარ მეფის ქუჩას. მისი თქმით, დაგეგმილია ავარიულ უბანზე სარეაბილიტაციო სამუშაოს ჩატარება, რომლის სიგრძეა 25 მეტრი. სამუშაოს ღირებულება 45 000 ლარს შეადგენს.
დაბა ჩაქვში სანაპირო ზოლში რკინიგზის სადგურის მიმდებარე ტერიტორიაზე არსებული ნაბირდამცავი კედლის რეაბილიტაციის პროექტიც დაიწყო. რკინიგზის სადგურის ახლოს დაგეგმილია დაზიანებულ ნაპირდამცავი ბეტონის ვერტიკალური კედლის რეაბილიტაცია. ნაგებობას საძირკველი აქვს გამორეცლხილი. დაზიანებულ უბნის სიგრძე 15 მეტრს შეადგენს. სამუშაოზე 15 000 ლარი დაიხარჯება.
"აბაშიძის დროს აქ მანგანუმის ფენა გამოაცალა მოსახლეობამ ბეტონის ფილებს და შედეგი ეს დიდი ორმოა. ორმო, რომელიც დიდდება და ღრმავდება. რკინიგზის ხაზს ემუქრება საშიშროება. ეს პრობლემა მოგვარდება უახლოეს პერიოდში", - განაცხადა გარემოს დაცვისა და ბუნებრივი რესურსების მინისტრმა.
შეგახსენებთ, რომ გასულ წელს მთელი საქართველოს მასშტაბით ნაპირსამაგრი სამუშაოს ჩატარებაზე სახელმწიფო ბიუჯეტიდან 8,5 მილიონი ლარი დაიხარჯა. სამუშაოების გამჭირვალედ, დროულად და ხარისხიანად ჩატარებისთვის გარემოს დაცვის სამინისტრომ ტენდერი ორ ეტაპად ჩაატარა. 6 რეგიონში ორმოცდაათამდე ყველაზე სახიფათო კალაპოტი გამაგრდება.
