3 თებერვალს, 11 საათზე სასტუმრო „რედისონში" „ვისოლ ჯგუფი" საზოგადოებას ამერიკული რესტორნების ქსელის „ვენდის" განვითარების გეგმებს გააცნობს და „ვენდის" პრეზიდენტსა და აღმასრულებელ დირექტორს ემილ ბროლიკს და საერთაშორისო პრეზიდენტს დარენ ვან ლიგტენს უმასპინძლებს. პრესკონფერენციას „ვისოლ ჯგუფის" პრეზიდენტთან სოსო ფხაკაძესთან ერთად საქართველოში შეერთებული შტატების ელჩი რიჩარდ ნორლანდი დაესწრება.
„ვისოლ ჯგუფმა", რომელიც ერთ-ერთი უმსხვილესი ბიზნეს ჯგუფია საქართველოში, სალიცენზიო შეთანხმებას „ვენდისთან" საქართველოსა და აზერბაიჯანში „ვენდის" რესტორნების ქსელის განვითარების შესახებ 2012 წელს მოაწერა ხელი. „ვენდის" პირველი რესტორანი საქართველოში 2013 წლის 12 სექტემბერს გაიხსნა. თბილისში, 1000 მ2 - ზე მეტ ფართზე განთავსებული ინოვაციური ინტერიერის დიზაინისა და უნიკალური მომსახურებათა პაკეტის მქონე „ვენდის" რესტორანი ყველაზე დიდი „ვენდის" რესტორანია მსოფლიოში.
