ნატოს შტაბბინაში ნატო-საქართველოს კომისიის (NATO-Georgia Commission-NGC) სხდომა გაიმართა. საქართველოს დელეგაციამ, რომელსაც ვიცე-პრემიერმინისტრი გიორგი ბარამიძე ხელმძღვანელობს, ნატოს მხარეს 2010 წლის წლიურ ეროვნული პროგრამა (Annual National Programm) გადასცა. დელეგაციაში ასევე შედიან სახელმწიფო მინისტრი რეინტეგრაციის საკითხებში და თავდაცვისა და საგარეო საქმეთა სამინისტროების წარმომადგენლები.
სხდომაზე ნატოს დელეგაციას ხელმძღვანელობდა ნატოს გენერალური მდივნის მოვალეობის შემსრულებელი, გენერალური მდივნის მოადგილე კლაუდიო ბიზონიერო.
შეხვედრაზე აღინიშნა, რომ საქართველო ძალიან ეფექტურად იყენებს ნატოსთან თანამშრომლობის მექანიზმებს, კერძოდ, წლიურ ეროვნულ პროგრამას (ANP). ასევე ხაზი გაესვა მიღწეულ მნიშვნელოვან პროგრესს და თავად დოკუმენტის სრულყოფილებას, განსაკუთრებით 2010 წლის პროგრამას.
ამავე სხდომაზე რეინტეგრაციის საკითხებში სახელმწიფო მინისტრმა თემურ იაკობაშვილმა ალიანსის წარმომადგენლებს ოკუპირებულ ტერიტორიებზე სახელმწიფო სტრატეგია წარუდგინა, რის მიმართაც ალიანსის წარმომადგენლებმა სრული მხარდაჭერა გამოხატეს.
დღესვე ბრიუსელში ხელი მოეწერა ნატოს ნდობის ფონდის პროექტს ფეთქებადი უვარგისი ნარჩენების გაუვნებელყოფის შესახებ (NAMSA). საქართველოს მხრიდან პროექტს ხელი მოაწერა გიორგი ბარამიძემ. მისი წარმატებით განხორციელება საქართველოს განაღმვითი შესაძლებლობების განვითარებას შეუწყობს ხელს.
ვიზიტის ფარგლებში ვიცე-პრემიერმინისტრმა ორმხრივი შეხვედრები გამართა ნატოს გენერალური მდივნის მოადგილესთან კლაუდიო ბიზონიეროსთან, ნატოში ლატვიის, ლიტვის, ჩეხეთის ელჩებთან. შეხვედრებზე ბარამიძემ ქვეყანაში მიმდინარე რეფორმებზე, რუსეთ-საქართველოს კონფლიქტზე, რუსეთის მიერ საქართველოს ოკუპირებულ ტერიტორიებზე დამატებითი სამხედრო ძალების შემოყვანაზე, ახალი სამხედრო ბაზების მშენებლობასა და ოკუპირებულ ტერიტორიებზე მცხოვრები ეთნიკური ქართველების უფლებების უხეშ დარღვევებზე.
