2013 წლის დეკემბერში წინა თვესთან შედარებით საქართველოში ინფლაციის დონემ 1,5 პროცენტი შეადგინა. „საქსტატის" ინფორმაციით, ინფლაციის მაჩვენებლის ფორმირებაში ძირითადი გავლენა იქონია ფასების ცვლილებამ სურსათისა და უალკოჰოლო სასმელების ჯგუფზე. აღნიშნულ ჯგუფში ფასები გაიზარდა 4,8 პროცენტით. შესაბამისად, ჯგუფის წვლილმა დეკემბრის თვის ინფლაციაში 1,49 პროცენტული პუნქტი შეადგინა. ფასების ზრდა განპირობებულია ბოსტნეულსა და ბაღჩეულზე ფასების 31,7 პროცენტიანი მატებით. ფასები გაიზარდა ასევე რძე, ყველი და კვერცხის ქვეჯგუფზე (1,7 პროცენტი). ამასთან, ფასები შემცირდა ხილისა და ყურძნის ქვეჯგუფზე (-3,5 პროცენტი);
მოცემულ პერიოდში ფასების 0,9 პროცენტიანი მატება დაფიქსირდა საცხოვრებელი, წყალი, ელექტროენერგია, აირის ჯგუფზე, რაც დეკემბრის თვის ინფლაციის მთლიან მაჩვენებელზე 0,08 პროცენტული პუნქტი წვლილით აისახა. ჯგუფში ფასები გაიზარდა მყარ საწვავზე (12,8 პროცენტი).
ამასთან, ფასები 0,9 პროცენტით შემცირდა ჯანმრთელობის დაცვაზე, ხოლო ჯგუფის წვლილმა თვის ინფლაციაში -0,08 პროცენტული პუნქტი შეადგინა. ფასები შემცირდა ფარმაცევტულ ნაწარმზე (-1,9 პროცენტი) და სტომატოლოგიურ მომსახურებაზე (-2,3 პროცენტი).
