გიგი უგულავა საკრებულოს გუშინდელ გადაწყევტილებას პოლიტიკურ დაკვეთას უწოდეს. უგულავას განცხადებით, საკრებულოს გუშინდელი გადაწყვეტილების შემდეგ საფრთხე დაემუქრება იმ პროექტების განხორციელებას, რომელსაც თბილისის მერია ახორციელებდა.
,, გუშინდელი საკრებულოს გადაწყვეტილების შემდეგ საფრთხის ქვეშ დადგა სასწრაფოს ფუნქციონირება, ტრანსპორტისა და სხვა შეღავათები, უფასო სასადილოები სოციალურად დაუცველთათვის, შესაძლოა შეფერხებები იყოს კომუნალური ვაუჩერის გაცემისას", _განაცხადა უგულავამ და აღნიშნა, რომ შესაძლოა საფრთხის ქვეშ დადგეს ახალი სკვერების, ხიდების გახსნაც.
მისივე განმარტებით, საკრებულოს ,,გუშინ განხორციელებული აქცია იმ ქმედებების გაგრძელებაა, რომელსაც თბილისის მიმართ ცენტრალური მთავრობა ჩადის". როგორც უგულავამ განმარტა, შესაძლოა თბილისი საერთოდ თვითმმართველობის გაუქმებამდე მივიდეს.
,,მე მინდა მოსახლეობას ვუთხრა იმ სავარაუდო გეგმის შესახებ რომელიც მთავრობას თბილისთან მიმართებაში გააჩნია. კანონის მიხედვით თუ სამ თვეში რომელიმე თვითმმართველობა ბიუჯეტს ვერ დაამტკიცებს ცენტრალურ მთავრობას, ანუ ღარიბაშვილს უფლება ექნება დაითხოვოს მერი, ან მისი მოვალეობის შემსრულებელი, საკრებულო და გამოაცხადოს თბილისში პირდაპირ საპროკურორო მმართველობა. საპროკუროროს, ბუნებრივია, გადატანითი მნიშვნელობით ვამბობ, მაგრამ მიმდინარე პოლიტიკური ვითარების ფონზე ძირითად სუსის, ან პროკურატურის მმართველობას ვიღებთ ყველა ადგილობრივ მმართველობაში. ამის შემდეგ, მთავრობას უკვე ადვილად შეეძლება თუნდაც აგერ ცხენის წელიწადი მოდის და ივანიშვილის პონი დანიშნოს პირდაპირ ობერპროკურორად და მან შეასრულოს არჩევნებამდე სამი თვით ადრე ის უფლებამოვალეობები რომელიც თბილისის არჩეულ მერსა და საკრებულოს აკისრია. ეს არ არის მოდელირებული ისტორია, რა თქმა უნდა, მაგრამ იმ ქმედებიდან გამომდინარე რასაც მთავრობისგან ვხედავთ სავსებით ლოგიკურად ჩანს, რომ ჩვენ შეიძლება მივიდეთ საერთოდ თბილისში, თვითმმართველობის გაუქმებამდე, რაც სახიფათო და საგანგაშო ტენდენციაა", _განაცხადა უგულავამ.
შეგახსენებთ, რომ დედაქალაქი 2014 წელს ბიუჯეტის გარეშე შეხვდება. საკრებულომ ხმათა უმრავლესობით თბილისის მთავრობის მიერ წარმოდგენილი საბიუჯეტო პროექტი ჩააგდო.
2014 წლის თბილისის ბიუჯეტის პროექტის წინააღმდეგ ხმა 21-მა დეპუტატმა მისცა. 18-მა მხარი დაუჭირა, სამმა კი თავი შეიკავა. საბიუჯეტო პროექტის დამტკიცებისთვის საკმარისი კვორუმი 24 ხმა იყო.
კენჭისყრას წინ ხანგრძლივი დებატები უძღოდა. უმრავლესობამ გააკრიტიკა როგორც თანხების განაწილების პრინციპი, ასევე თბილისის მთავრობის მიერ განსაზღვრული პრიორიტეტები.
შენიშვნები გამოითქვა ბიუჯეტის პროექტში ჩადებულ პროგრამებზე, რომელიც შეეხება სატრანსპორტო ინფრასტრუქტურას, კომუნალური ვაუჩერის პროგრამას, უფასო და შეღავათიანი ტრანსპორტით მომსახურებას, რაიონების მიხედვით განსაზღვრულ სოციალურ დახმარებებს და წყალმომარაგების მოწესრიგებისათვის განსაზღვრულ ღონისძიებებს.
