დღეს, 8 ოქტომბერს, თურქეთის ქალაქ სტამბოლში საქართველოს მთავრობასა და თურქეთის რესპუბლიკის მთავრობას შორის ხელი მოაეწერა შეთანხმებას სარფი-სარფ, კარწახი-ჩილდირ/აკტაშ, ახალციხე-პოსოფი/თურქგოუზ-ის სახმელეთო საბაჟო გამშვები პუნქტების ერთობლივად მართვის შესახებ.
საქართველოს მთავრობის სახელით შეთანხმებას ხელი მოაწერა ფინანსთა მინისტრმა კახა ბაინდურაშვილმა, თურქეთის რესპუბლიკის მთავრობის სახელით სახელმწიფო მინისტრმა ჰაიათ იაზიჯიმ (იგი კურირებს საბაჟო საკითხებს).
ფინანსთა სამინისტროს ინფორმაციით, აღნიშნული შეთანხმება კიდევ ერთხელ ადასტურებს საქართველოსა და თურქეთის მთავრობებს შორის თანამშრომლობის მაღალ დონეს და ხელს უწყობს ორი ქვეყნის საბაჟო-გამშვები პუნქტების ეფექტურ მართვას, ტურისტული და სატრანსპორტო ნაკადის გაზრდას, ჩვენს ქვეყნებს შორის სავაჭრო-ეკონომიკური პარტნიორობის ინტენსიფიკაციას.
შეთანხმების ხელმოწერას წინ უსწრებდა 27 სექტემბერს ფინანსთა მინისტრის სამუშაო ვიზიტი თურქეთში, სადაც ბაინდურაშვილი შეხვდა ჰაიათი იაზიჯის და განიხილეს საბაჟო-გამშვები პუნქტების (ვალე, სარფი, კარწახი) სარეაბილიტაციო სამუშაოების მიმდინარეობის პროცესი, ასევე თურქეთთან ერთად საბაჟო-გამშვები პუნქტების ერთობლივად მართვის საკითხები.
ორი ქვეყნის საბაჟოების გაერთიანების შესახებ რამდენჯერმე ისაუბრეს საქართველოს პრეზიდენტმა და თურქეთის პრემიერმა ერდოღანმა.
მიმდინარე წლის მაისში პრეზიდენტმა თურქეთის პრემიერი საქართველოში ვიზიტის დროს ოქროს საწმისის ორდენით დააჯილდოვა და გაიხსნება ის დაპირებები, რომელიც ერდოღანმა გააკეთა ორი ქვეყნის საბაჟოების გაერთიანებისა და ორი ქვეყნის მოქალაქეებისათვის საზღვრის უპრობლემოდ გადაკვეთის თაობაზე, რისთვისაც მას პრეზიდენტმა კიდევ ერთხელ გადაუხადა მადლობა.