ძალიან შემაძრწუნებელი იყო, რასაც ვუყურე - ასე აფასებს საპარლამენტო უმრავლესობის წევრი გიორგი ვოლსკი იურიდიული კომიტეტის სხდომაზე პერფორმანსს, რომლის დროსაც ოპოზიციის წარმომადგენლებმა ირაკლი შოთაძის გენერალურ პროკურორად დაბრუნება გააპროტესტეს.
ვოლსკის თქმით, ირაკლი შოთაძის გენერალურ პროკურორად დაბრუნების შემთხვევაში, პროკურატურა პოლიტიკური წნეხისგან თავისუფალი იქნება.
"ძალიან შემაძრწუნებელი იყო, რასაც ვუყურე. ადამიანები არიან იმ პოლიტიკურ ძალაში, თვითონ არ ჩაუდენიათ, მაგრამ სისხლი დაღვარეს, ძალიან დიდი რაოდენობით ადამიანი გააუბედურეს.
დღეს ისე იქცევიან, გეგონება დემოკრატიის ერთადერთი მაძებარები არიან და თანაც ევროპის ეგიდით. ეს არის სირცხვილი", - თქვა ვოლსკიმ.
შეგახსენებთ, პარლამენტის იურიდიული კომიტეტის სხომდაზე, გენერალური პროკურორობის კანდიდატს ირაკლი შოთაძეს უსმენენ. ელენე ხოშტარია და თინა ბოკუჩავა მოსმენაზე ბიძინა ივანიშვილის ნიღბებით შევიდნენ და შოთაძეს უთხრეს, რომ ის ივანიშვილის მონაა.