საქართველოს იუსტიციის მინისტრი თეა წულუკიანი აცხადებს, რომ ქვეყანაში გამოხატვის თავისუფლება დაცულია და საკრებულოს დეპუტატმა ერეკლე კუხიანიძემ თანამდებობა არ უნდა დატოვოს.
"ემოციური თუ პოლიტიკური განცხადებები პირველ რიგში პატიმრის ინტერესს აზიანებს, რომლის გათავისუფლებაც არის ჩვენი ერთ-ერთი მთავარი პრიორიტეტი. რისთვისაც პირველივე საათიდან პატიმრობისა მობილიზებულია სამთავრობო უწყებები და უპრეცენდენტო ძალისხმევა ხორციელდება, მაგრამ არც ისე შორს არ მივდივარ, რომ ვინმემ თანამდებობა უნდა დატოვოს.
ყველას გვაქვს ჩვენი უფლება გამოვხატოთ აზრი, თუნდაც ეს იყოს შოკისმომგვრელი სიტყვებით," - განაცხადა თეა წულუკიანმა.
შეგახსენებთ, საზოგადოების აღშფოთება ერეკლე კუხიანიძის მიერ 14 დეკემბერს გამოქვეყნებულმა პოსტმა გამოიწვია, სადაც ის შეურაცხმყოფელი სიტყვებით მოიხსენიებს საოკპუაციო რეჟიმის მიერ დატყვევებულ ვაჟა გაფრინდაშვილსა და მის ოჯახს და მათ "პროვოკატორებს" უწოდებს.
გარდა ამისა, კიდევ ერთი პოსტი გამოაქვეყნა სოციალურ ქსელში, სადაც საზოგადოებას "ღრმა ფსიქიკური აშლილობის" დიაგნოზი დაუსვა.
დღეს, საკრებულოს შენობასთან სამოქალაქო აქტივისტებმა დაგმეს ერეკლე კუხიანიძის განცხადებები და მოითხოვეს, დატოვოს სადეპუტატო მანდატი.
