სახელმწიფო ელექტროსისტემის ყოფილი CEO სულხან ზუმბურიძე აუდიტის სამსახურის მიერ გამოქვეყნებულ ანგარიშს პასუხობს და ამბობს, რომ როუმინგის 29,000-ლარიანი ხარჯი, რომელიც აუდიტის ანგარიშში არის ასახული, შემთხვევით დაეხარჯა.
“წარმოდგენაც არ მქონდა ეს 29,000 ლარი როგორ დაგროვდა,” - ამბობს ზუმბურიძე გადაცემა "საქმის კურსში".
ზუმბურიძემ განაცხადა, რომ მსგავსი ფაქტები სხვა ადამიანებსაც შემთხვევიათ, როდესაც როუმინგის გამო, მათ მოულოდნელად სოლიდური თანხის გადახდა მოუწიათ:
“რაც შეეხება როუმინგის ნაწილს, იყო ეს ფაქტი, 5 დღეში ვამბობთ, რომ არის 29,000 ლარი დახარჯული. ალბათ ყველას წარმოგვიდგენია, რომ სულაც 24 საათი ადამიანი ტელეფონზე რომ იყოს, ამდენს ვერ დააგროვებს. ბევრმა ადამიანმა იცის, რომ ამ ქვეყანაში მომხდარა ამგვარი ფაქტები დატას გამო, თუ დარჩა ადამიანს ჩართული და იყო პერიოდი, როდესაც ოპერატორები ვერ აფრთხილებდნენ ამის შესახებ მომხმარებელს და ლაივ რეჟიმში არ ხდებოდა ინფორმაციის გაცვლა ოპერატორებს შორის. ეს გროვდებოდა, ავტომატურად. ახლა უკვე გამოსწორდა ეს ხარვეზი, თუ შემთხვევით ჩაგერთო ეს დატა", - ამბობს ზუმბურიძე.
შეგახსენებთ, რომ ელექტროსისტემის აუდიტის მიხედვით, ზუმბურიძის როუმინგის ჯამურმა ხარჯმა 2014-2017 წლებში 156,000 ლარი შეადგინა, ხოლო კონკრეტულად 2014 წლის აგვისტოს 5 დღის განმავლობაში “სახელმწიფო ელექტროსისტემის” მაშინდელი CEO-ს სატელეფონო ქვითარმა - 29,254 ლარი. ამ ხარჯს აუდიტის სამსახური არაგონივრულს უწოდებს.