ამერიკელმა დემოკრატმა კონგრესმენმა, ალბიო საირესმა, რუსეთის "დიდ შვიდეულში" (G7) დაბრუნების წინააღდეგ, კონგრესს კანონპროექტი წარუდგინა.
კანონპროექტში საუბარია რუსეთის მიერ უკრაინის ტერიტორიების ოკუპაციასა და ყირიმის ანექსიაზე. საქართველოსა და რუსეთის მიერ საქართველოს ტერიტორიების ოკუპაციაზე კი არაფერია ნათქვამი.
კონგრესმენი ალბიო საირესი აღნიშნავს, რომ სანამ რუსეთი აგრძელებს უკრაინის ტერიტორიების ოკუპაციას და თავდასხმებს მთელი მსოფლიოს დემოკრატიებზე, მისი დიდ შვიდეულში დაბრუნების საკითხი არ უნდა განიხილონ.
როგორც კანონპროექტშია წერია, რუსეთი დიდ შვიდეულში მხოლოდ გარკვეული პირობების დაკმაყოფილების შემდეგ შეიძლება დაბრუნდეს.
"აშშ-ის წარმომადგენელთა პალატა მოუწოდებს დიდი შვიდეულის წევრ ქვეყნებს, რომ არ დაუშვან რუსეთის დიდ შვიდეულში დაბრუნება", - აღნიშნულია კანონპროექტში.
მანამდე დემოკრატმა სენატორებმა ჯეკ რიდმა, ჩაკ შუმერმა, რობერტ მენენდესმა და მარკ უორნერმა საჯარო წერილით მიმართეს შეერთებული შტატების პრეზიდენტს და მოუწოდეს არ დაუშვას რუსეთის დიდ შვიდეულში დაბრუნება.
სენატორები აღნიშნავდნენ, რომ რუსეთი უგულვებელყოფს საერთაშორისო სამართლის პრინციპებს და ამის მაგალითებად მოჰყავდათ ყირიმის ანექსია, საქართველოს ტერიტორიების ოკუპაცია, აშშ-ის არჩევნებში ჩარევა, სოლსბერიში ქიმიური იარაღის გამოყენება და ასადისა და მადუროს რეჟიმების მხარდაჭერა.
"ამ მიზეზების გამო რუსეთის პრეზიდენტი არ უნდა დაიშვას დიდი შვიდეულის შემადგენლობაში, სანამ რუსეთის ხელისუფლება მკაფიოდ არ დაანახებს საზოგადოებას, რომ იგი მზადაა მოიქცეს პასუხისმგებლობით", - ეწერა წერილში.
შეგახსენებთ, 2014 წელს უკრაინის კუთვნილი ყირიმის რეგიონის მიტაცების გამო რუსეთის ფედერაციას დიდი რვიანის (G8) შემადგენლობა დაატოვებინეს.
