აშშ-ის შუალედური არჩევნების შედეგებთან დაკავშირებით NBC News-ის პროგნოზის მიხედვით, დემოკრატიული პარტია წარმომადგენელთა პალატაში უმრავლესობის მოპოვებას და დაახლოებით 244 მანდატის მიღებას შეძლებს.
2026 წლის 3 ნოემბერს აშშ-ში გამართულ შუალედურ არჩევნებში დემოკრატებმა რესპუბლიკელებისგან წარმომადგენელთა პალატაზე კონტროლი გადაიბარეს. ამის შესახებ NBC News-ის პროგნოზები მიუთითებს.
NBC News-ის შეფასებით, დემოკრატები 435-ადგილიან წარმომადგენელთა პალატაში, სულ მცირე, 244 მანდატს მოიპოვებენ. უმრავლესობისთვის პარტიას 218 მანდატი სჭირდება.
ბოლო მონაცემებით, დემოკრატებმა რამდენიმე მნიშვნელოვან საარჩევნო ოლქში გამარჯვება მოიპოვეს.
NBC News-ის პროგნოზით, პარტიის კანდიდატები ნიუ ჯერსისა და ჩრდილოეთ კაროლინის ოლქებში იმარჯვებენ. გარდა ამისა, პენსილვანიაში დემოკრატი პეიჯ კოგნეტი, ხოლო კოლორადოში მენი რუტინელი ლიდერობენ და, სავარაუდოდ, გამარჯვებას მოიპოვებენ.
ამასთან, ამომრჩეველთა ხმების დათვლის მიმდინარე პროცესში დემოკრატები წარმატებას აღწევენ სენატშიც. როგორც მედია წერს, თუ პარტია კონგრესის ორივე პალატაზე კონტროლს მოიპოვებს, ეს მნიშვნელოვნად შეზღუდავს ტრამპის შესაძლებლობებს პრეზიდენტობის ბოლო ორი წლის განმავლობაში.
წარმომადგენელთა პალატაზე კონტროლის მოპოვება დემოკრატებს საშუალებას მისცემს, კომიტეტების ხელმძღვანელობა გადაიბარონ, მოიწვიონ მოსმენები, დაიწყონ გამოძიებები და მოითხოვონ ადმინისტრაციის საქმიანობასთან დაკავშირებული დოკუმენტები.
მედიის ცნობით, შედეგი დონალდ ტრამპის პრეზიდენტობის მეორე ნახევარში კონგრესსა და თეთრ სახლს შორის პოლიტიკური დაპირისპირების გაძლიერებას მოასწავებს.
