მოსამართლე ილონა თოდუა იუსტიციის უმაღლესი საბჭოს არამოსამართლე წევრს, ნაზი ჯანეზაშვილს ცილისწამებაში ადანაშაულებს.
საქმე ეხება ნაზი ჯანეზაშვილის დღევანდელ განცხადებას, სადაც ის აღნიშნავს, რომ ილონა თოდუამ მის სახელზე რეგისტრირებული უძრავი ქონება დედის სახელზე გადააფორმა ჩუქების პრინციპით. ამის შემდეგ კი, იუსტიციის უმაღლესმა საბჭომ მიიღო გადაწყვეტილება, რომ ილონა თოდუას მისცენ ბინის ქირის საფასური.
ილონა თოდუა განმარტავს, რომ სამოსამართლეო უფლებამოსილების ამოწურვისთანავე მიმართა იუსტიციის საბჭოს შესაბამის დეპარტამენტს იმისთვის, რომ შეეწყვიტათ მისთვის საცხოვრებელი ბინის დაქირავების თანხის გადახდა.
“ სამოსამართლეო უფლებამოსილების ამოწურვისთანავე, დაუყოვნებლივ ვაცნობე იუსტიციის უმაღლესი საბჭოს მატერიალური უზრუნველყოფის დეპარტამენტს, რათა შეწყვეტილიყო ჩემთვის საცხოვრებელი ბინის დაქირავების თანხის გადახდა და ასევე, დაუყოვნებლივ დავაბრუნე ჩემთვის სამსახურეობრივად გამოყოფილი სატრანსპორტო საშუალება. აქვე მოგახსენებთ, რომ სამოსამართლეო უფლებამოსილების ამოწურვის შემდგომ, მოსამართლედ ხელახლა გამწესებამდე და გამწესების შემდგომ, ჩემივე ხარჯით (ქირით) გავაგრძელე ცხოვრება ჩემს მეუღლესთან და შვილთან ერთად დაქირავებულ ბინაში, საკუთარი საცხოვრებელი ბინის შეძენა კი მოვახერხე მხოლოდ 2018 წლის ნოემბერში, საბანკო კრედიტის დახმარებით.
სამწუხაროა, რომ იუსტიციის უმაღლესი საბჭოს წევრი კანონით მისთვის გათვალისწინებული ვალდებულებების შესრულების ნაცვლად მოსამართლის დისკრედიტაციას ეწევა მიუღებელი ფორმით.
ზემოაღნიშნული ცილისმწამებლური კამპანია, ჩემი მოსაზრებით, მიზნად მხოლოდ ერთ რამეს, ჩემი როგორც დამოუკიდებელი და მიუკერძოებელი მოსამართლის დისკრედიტაციას ისახავს.
ნებისმიერ დაინტერესებულ პირს მივაწვდი ჩემს მიერ მითითებული გარემოებების დამადასტურებელ დოკუმენტებს”, -ნათქვამია მოსამართლე ილონა თოდუას მიერ გავრცელებულ განცხადებაში.
