სახელმწიფო შესყიდვების სააგენტოს ოფიციალურ ვებგვერდზე გამოცხადდა კონსოლიდირებული ტენდერი (აუქციონის გარეშე). შესყიდვის სავარაუდო ღირებულება 9 045 000 ლარია.
შესყიდვის ობიექტს წარმოადგენს საქართველოს მთავრობის 2014 წლის 6 თებერვალის N121 დადგენილებით განსაზღვრული III კლასის (მაღალი გამავლობა - ჯიპი) 135 ერთეული სატრანსპორტო საშუალება, რომლის რაოდენობაც საორიენტაციო ხასიათისაა და შეიძლება შეიცვალოს 20%-ის ოდენობით.
სატენდერო პირობების თანახმად, მანქანები უნდა იყოს 2019 წელს გამოშვებული და ნებისმიერი ფერი, გარდა შავისა.
შემოთავაზებული ავტომობილები უნდა იყოს ახალი, არაუადრეს 2019 წლის გამოშვების, ექსპლუატაციაში არმყოფი (გარბენი არაუმეტეს 200კმ), ნივთობრივად და უფლებრივად უნაკლო და განბაჟებული. ამასთან, მიმწოდებელმა საკუთარი ხარჯებით უნდა უზრუნველყოს ავტომანქანების შემსყიდველზე გადაფორმება.
ავტოსატრანსპორტო საშუალებების მიწოდება უნდა განხორციელდეს ეტაპობრივად ხელშეკრულების გაფორმების შემდგომ, შესაბამისი მოთხოვნის წარდგენიდან 120 კალენდარული დღის განმავლობაში.