სოფლის მეურნეობის განვითარების საერთაშორისო ფონდის მიერ გამოყოფილი 8 მლნ. დოლარით ქვეყანაში სასოფლო-სამეურნეო საქმიანობის შელშეწყობისათვის დაიხარჯება
საქართველოსა და სოფლის მეურნეობის განვითარების საერთაშორისო ფონდს (IFAD) შორის, 2010 წლის 8 ივლისს ხელმოწერილი ფინანსური შეთანხმება "სოფლის მეურნეობის ხელშეწყობის პროექტის" თაობაზე სარატიფიკაციოდ აგრარულ საკითხთა კომიტეტის სხდომაზე დღეს საქართველოს ფინანსთა მინისტრის მოადგილემ, ნათია მიქელაძემ წარადგინა.
"აღნიშნული შეთანხმება დაფინანსების ფარგლებში დაახლოებით 8 მლნ. აშშ დოლარის სესხის გამოყოფას ითვალისწინებს რომელიც საქართველოში სასოფლო-სამეურნეო საქმიანობით დაკავებულ სოფლის მცხოვრებთა შემოსავლის გაზრდას მოხმარდება", - განმარტა ფინანსთა მინისტრის მოადგილემ ნათია მიქელაძემ.
"სოფლის მეურნეობის ხელშეწყობის პროექტით" დაგეგმილია სოფლად სალიზინგო ოპერაციების მხარდაჭერა და სოფლის მცირემასშტაბიანი ინფრასტრუქტურის განსავითარებლად ინვესტიციების განხორციელება. აღნიშნული პროექტის განხორციელებისთვის IFAD-ის მიერ გამოყოფილი 8 მლნ. აშშ დოლარი სესხს, ხოლო 195 ათასი აშშ დოლარი კი გრანტს წარმოადგენს.
ფინანსური შეთანხმების მიხედვით, "სოფლის მეურნეობის ხელშეწყობის პროექტის" განხორციელების პერიოდი 4 წელია.
