ოკუპანტების მიერ გატაცებული ექიმის, ვაჟა გაფრინდაშვილის ოჯახი საქართველოს პრემიერ-მინისტრთან, გიორგი გახარიასთან შეხვედრასა და უწყებათაშორისი კომისიის შექმნას ითხოვს.
"ძალიან სამწუხაროა, რომ ჩვენი სახელმწიფოსა და საერთაშორისო ორგანიზაციების ჩართულობამ შედეგი არ მოგვცა და ვაჟა ისევ საპატიმროში რჩება. ეს ხარვეზებზე მიგვითითებს, რომლებიც გამოსასწორებელია. ჩვენ, ოჯახი და მეგობრები, მაქსიმუმს ვაკეთებთ. საჭიროა უწყებათაშორისი კომისიის შექმნა. პირველად ვითხოვთ პრემიერმინისტრთან შეხვედრას, რომ მან დააკორექტიროს ეს ყველაფერი და შეიყვანოს საკოორდინაციო საბჭოში ის უწყებები, რომლებსაც ხელეწიფებათ ამ საკითხის გადაწყვეტა",-თქვეს გაფრინდაშვილის ოჯახის წევრებმა.
ოჯახის ინფორმაციით, ვაჟა გაფრინდაშვილს საპატიმროში საკვებისა და ტანსაცმლის პრობლემა აქვს.
ვაჟა გაფრინდაშვილის ოჯახის ინფორმაციით, მხარდამჭერებთან ერთად 15 დეკემბერს საოკუპაციო ხაზთან სოლიდარობის აქციას გამართავენ.
"რადგან თბილ ოთახში ლაპარაკმა შედეგი არ მოგვცა, ჩვენ, სამედიცინო საზოგადოება და ადამიანები, რომლებსაც აწუხებთ პატრიოტი ადამიანის ტყვეობაში ყოფნა, ვიკრიბებით კვირას, 11 საათზე, რესპუბლიკის მოედანზე და გავდივართ საოკუპაციო ხაზთან, რათა დავანახოთ ჩვენი მშვიდობიანი პროტესტის ძალა და გამოვხატოთ სოლიდარობა",-თქვეს ოჯახის წევრებმა.
დღეს ოკუპირებული ცხინვალის ე.წ სასამართლომ ვაჟა გაფრინდაშვილის პატიმრობა ძალაში დატოვა. ვაჟა გაფრინდაშვილი 35-ე დღეა, უკანონო პატიმრობაში იმყოფება.