ხელშეკრულების ცერემონიალი ფილიპინებში, ქალაქ მანილაში გაიმართა. როგორც "ჯი-ეიჩ-ენს" "საქართველოს ბანკიდან" აცნობეს, ღნიშნული ხელშეკრულებები მიზნად ისახავს ვაჭრობის სექტორის სტიმულირებას და საქართველოს, როგორც ევროპასა და აზიას შორის სტრატეგიული მაგისტრალის, როლის გაძლიერებას.

აღნიშნული ხელშეკრულებები, რომლებსაც აზიის განვითარების ბანკი პირველად აწერს ხელს საქართველოში, წარმოადგენს აზიის განვითარების ბანკის ვაჭრობის დაფინანსების პროგრამის ნაწილს, რომლის ფარგლებშიც ბანკების საშუალებით ხდება გარანტიების და სესხების ხელმისაწვდომობის უზრუნველყოფა აზიის განვითარების ბანკის გარდამავალ ეტაპზე მყოფ წევრ სახელმწიფოებში საერთაშორისო ვაჭრობის ხელშესაწყობად.

"საქართველო მდებარეობს ევროპის და აზიის მსხვილი ბაზრების გზაჯვარედინზე; ეს ფაქტორი კარგ შესაძლებლობებს უქმნის ქვეყანას იმისათვის, რომ ხელსაყრელი შედეგები მიიღოს ორ რეგიონს შორის მზარდი ვაჭრობიდან მსოფლიოში ეკონომიკური ვითარების გაწონასწორების პირობებში. თუმცა, ზემოაღნიშნული მნიშვნელოვნად იქნება დამოკიდებული, ქართული და სხვა ბანკების მიერ ვაჭრობის დაფინანსების სახსრების გაზრდაზე, რაც შესაძლებლობას მისცემს ადგილობრივ კომპანიებს განახორციელონ საქონლის იმპორტი/ექსპორტი. ვაჭრობის დაფინანსების შესახებ ხელშეკრულებები ხელს შეუწყობს კომპანიებს, მათ შორის, მცირე და საშუალო ზომის საწარმოებს დაფინანსების ძირითადი წყაროების ხელმისაწვდომობაში და ბიზნესის გაფართოებაში. თავის მხრივ, ეს განაპირობებს დასაქმების სტიმულირებას, ხელს შეუწყობს ეკონომიკურ ზრდას და გააფართოებს ქვეყნის საერთაშორისო ვაჭრობის კავშირებს," - განაცხადა აზიის განვითარების ბანკის ვიცე-პრეზიდენტმა კერძო სექტორის ოპერაციებში და თანადაფინანსების ოპერაციებში, ლაკშმი ვენკატაჩალამმა, რომელიც ხელმოწერის ცერემონიას დაესწრო.

საქართველოში მცირე და საშუალო ზომის კომპანიებში დასაქმებულია ქვეყნის მთლიანი სამუშაო ძალის 40%-ზე ნაკლები -- ეს მაჩვენებელი უფრო ნაკლებია, ვიდრე გარდამავალ ეტაპზე მყოფ მრავალ სხვა ქვეყანაში; ეს ნაწილობრივ გამოწვეულია დაფინანსების ხელმისაწვდომობის ნაკლებობით. ფინანსურ რესურსებზე მათი წვდომის გაუმჯობესება, ხელს შეუწყობდა ამ კომპანიების გაფართოებას.

2010 წელს აზიის განვითარების ბანკის ვაჭრობის დაფინანსების პროგრამის ფარგლებში დაფინანსდა 2.8 მილიარდი დოლარის ოდენობის სავაჭრო ოპერაციები, რაც 47%-ით მეტია 2009 წელს განხორციელებული დაფინანსებასთან -- 1.9 მილიარდ დოლართან შედარებით. რეგიონში მთლიანობაში დაფინანსებული 783 ოპერაციიდან 270-ზე მეტი მცირე კომპანიების მონაწილეობით განხორციელდა. 2004 წელს ოპერაციების დაწყებიდან ბანკმა მხარი დაუჭირა 5.2 მილიარდი დოლარის ოდენობით სავაჭრო ოპერაციებს. აქტიური პორტფოლიოს ნახევარი გამოიყენება აზიის განვითარების ბანკის გარდამავალ ეტაპზე არსებულ წევრი სახელმწიფოებს შორის სავაჭრო ოპერაციების ხელშესაწყობად.

აზიის განვითარების ბანკი, რომელსაც მინიჭებული აქვს საკრედიტო რეიტინგი -- AAA (სამი ა), 2011 წელს გააგრძელებს პროგრამის მოცვის სფეროს გაფართოებას რეგიონის შიგნით ვაჭრობისა და ეკონომიკური ინტეგრაციის ხელშეწყობის მიზნით. პროგრამაში უკვე 200-ზე მეტი ბანკია ჩართული, მათ შორის არიან ორგანიზაციები ცენტრალურ აზიიდან, აზერბაიჯანიდან, უზბეკეთიდან და ტაჯიკეთიდან.

აზიის განვითარების ბანკი, რომლის ცენტრალური ოფისი მდებარეობს ქ. მანილაში, მიზნად ისახავს აზიაში და წყნარი ოკეანის აუზის ქვეყნებში სიღარიბის დონის შემცირებას მრავალმხრივი ეკონომიკური ზრდის, ეკოლოგიურად მდგრადი განვითარების, და რეგიონალური ინტეგრაციის გზით. აზიის განვითარების ბანკი დაფუძნდა 1966 წელს, მისი მესაკუთრეა 67 წევრი -- აქედან 48 -- რეგიონიდან. 2010 წელს ბანკის მიერ, თანადაფინანსების ჩათვლით, დამტკიცებული დაფინანსება 17.51 მილიარდ დოლარს აღწევს სესხების, გრანტების, გარანტიების, წილების საინვეტიციო შესყიდვების და ტექნიკური დახმარების პროექტების გზით დაფინანსების ოპერაციებისათვის. მიმდინარე ვაჭრობის დაფინანსების პროგრამის ფარგლებში ბანკის მიერ გაწეულმა დაფინანსებამ 2.8 მილიარდი დოლარი შეადგინა.