საერთაშორისო ინვესტორების დაინტერესებას საქართველოს მთავრობა კანის უძრავი ქონების საერთაშორისო გამოფენაზე შეეცდება. საქართველო 8-11 მარტს, საფრანგეთის ქალაქ კანში დაგეგმილ უძრავი ქონების საერთაშორისო გამოფენა "მიპიმი-2011"-ში მიიღებს მონაწილეობას.
საქართველოდან გამოფენაში ეროვნულ საინვესტიციო სააგენტო და თბილისის მერია იქნებიან წარმოდგენილნი, რომლებიც წარადგენს რკინიგზის გადატანის პროექტს და თბილისის ზღვის ტერიტორიის განვითარების კონცეფციას, რომელიც მიბმული იქნება 2015 წელს დაგეგმილი ახალგაზრდული ოლიმპიური ფესტივალის
მასპინძლობასთან.
იმავდროულად, ქართული მხარე "მიპიმი-2011"-ზე ანაკლიისა და მესტრიის
ტურისტული პროექტების წარდგენასაც გეგმავს.
"ეს არის ერთ-ერთი ყველაზე დიდი და მასშტაბური გამოფენა, რომელსაც უძრავი ქონების ბაზარზე მომუშავე კომპანიის წარმომადგენელი ესწრება. გამოფენას დაესწრებიან ასევე საკმაოდ მაღალი თანამდებობის პირებიც. სწორედ ამიტომ ეკონომიკისა და მდგრადი განვითარების სამინისტრომ ამ გამოფენაზე მესტიისა და ანაკლიის პროექტების წარდგენა გადაწყვიტა. გამოფენის ფარგლებში გვექნება სხვადასხვა პრეზენტაციები და უძრავი კომპანიების წარმომადგენლებთან შეხვედრა", _ განაცხადა "ჯი-ეიჩ-ენთან" საუბარში ეროვნული საინვესტიციო სააგენტოს ხელმძღვანელმა ქეთი ბოჭორიშვილმა.
ეკონომიკისა და მდგრადი განვითარების სამინისტროს ინფორმაციით, ანაკლიისა და მესტიის თავისუფალი ტურისტული ზონის განვითარების ხელშეწყობისა და პოპულარიზაციის მიზნით, აუცილებლობას წარმოადგენს სახელწიფოებრივად მნიშვნელოვანი პროექტების საერთაშორისო ბაზარზე გატანა, რათა მოხდეს ინვესტირთა დაინტერესება შავიზღვისპირეთისა და მაღალმთიანი რეგიონის თავისუფალი ტურისტული ზონების შესაძლებლობებით.
