ბიზნესსექტორს 3-4 თვეში ყველა პრობლემა მოუგვარდება. ამის პირობას ფინანსთა მინისტრი კახა ბაინდურაშვილი დებს. როგორც ბაინდურაშვილმა დღეს მთავრობის სხდომის დაწყების წინ განაცხადა, სხდომაზე შემოსავლების სამსახურის "ახალი კურსი"-ს პრეზენტაცია მოხდება და თუ მინისტრთა კაბინეტს რაიმე შენიშვნა ექნება ისინი აუცილებლად იქნება გათვალისწინებული.
"ახალი კურსი" მიმართულია იმ პრობლემების აღმოსაფხვრელად, რომელიც არსებობს და აწუხებს დღეს ბიზნესსექტორს. 2010 წლის განმავლობაში ჩვენ ვემზადებოდი დავწერეთ ახალი საგადასახადო კოდექსი და მომზადდა ასევე ახალი ინფრატსრუქტურაც. ბევრი პროცედურა დაიგეგმა და უკვე დეკემბრიდან ჩვენ ამ პროცედურების ამუშავებაზე გადავდივართ", _ განაცხადა ბაინდურაშვილმა.
მისივე განმარტებით, ახალი საგადასახადო კოდექსი სრული დატვირთვით 2011 წლის იანვრიდან ამოქმედდება.
"მოწესრიგდება ინფრასტრუქტურა და ახალი გაფორმების ეკონომიკური ზონები (გეზ-ი) გაიხსნება. ახალი სერვისების ნაწილი უკვე ძალაშია და ნაწილიც მალე ამოქმედდება და ყველა ის პრობლემა რომელიც დღეს ბიზნესსექტორს აწუხებს 3-4 თვის განმავლობაში იქნება დაძლეული", - განაცხადა კახა ბაინდურაშვილმა.
მინისტრის განმარტებით, დღემდე ბიზნესს ძირითადად ადმინისტრირებასთან დაკავშირებული პრობლემები ჰქონდა.
"ძირითადად ეს იყო ადმინისტრირებასთან დაკავშირებული პრობლემები. ასევე სისტემის გაუმართაობასთან დაკავშირებული პრობლემები, ხოო საბაჟოზე არსებული პრობლემები მაინც ინფრასტრუქტურას უკავშირდებოდა და ეს პრობლემებიც ადლიის და ფოთის გაფორმების ეკონომიკური ზონების (გეზ-ი) გახსნის შემდეგ აღმოიფხვრება", - განაცხადა ფინანსთა მინისტრმა.
შეგახსენებთ, რომ 3 დეკემბერს საქართველოს პრეზიდენტმა მიხეილ სააკაშვილმა ლილოში ოფიციალურად გახსნა ახალი საერთაშორისო სტანდარტების შესაბამისი გაფორმების ეკონომიკური ზონა. გახსნას დაესწრნენ პრემიერ-მინისტრი ნიკა გილაური, ფინანსთა მინისტრი კახა ბაინდურაშვილი, შემოსავლების სამსახურის უფროსი გიორგი ცხაკაია.
გაფორმების ეკონომიკური ზონა (გეზი) ეს არის საქართველოში უპრეცედენტო სიდიდის, 12 ჰექტარზე გაშენებული კეთილმოწყობილი ტერიტორია სრული კომფორტით. სპეციალურად დაგეგმარებული ავტოსადგომი გათვლილია 400 სატვირთო ავტომანქანაზე. შესაძლებელია ერთდროულიად ნებისმიერი რაოდენობის იმპორტიორის მომსახურება კვირაში შვიდი დღე, 24 საათის განმავლობაში. ტვირთის გაფორმებისას, იმპორტიორს აღარ უწევს ძვირადღირებული ბროკერისა და დეკლარატის დაქირავება.
შესაძლებელია იმპორტიორმა დაისვენოს იმ დროს, სანამ მისი ტვირთი გადის გაფორმების პროცედურას. იმპორტიორის სრული ინფორმირება ხდება ერთ ფანჯარასთან, რითაც იგი ზოგავს დროსა და ენერგიას. იმპორტიორს შესაძლებლობა აქვს ისარგებლოს ექსპერტისა და ტექნიკური პერსონალის მომსახურებით. გეზში ტვირთის გაფორმების საფასურის გადახდა შესაძლებელია 5-დღიანი გადავადებით.
ტვირთის გაფორმების სრული პროცედურა აქ რამდენიმე წუთში სრულდება.
გაფორმების ეკონომიკური ზონის შექმნა ახალი ეკონომიკური კურსის ნაწილია, რომელიც ითვალისწინებს სამართლიანი, მარტივი და სანდო საგადასახადო სისტემის შეთავაზებას ბიზნესისათვის.