საქართველოს კონტროლის პალატას ლატვიის სახელმწიფო აუდიტორული ოფისის წარმომადგენლები სტუმრობენ.
როგორც სააგენტო "ჯი-ეიჩ-ენს" კონტროლის პალატიდან აცნობეს, ლატვიელი კოლეგების სტუმრობის მიზანია კონტროლის პალატის თანამშრომლებთან ერთად სამი სამინისტროს საპილოტე აუდიტის ჩატარება.
აღნიშნული ღონისძიება ხორციელდება 2010 წლის 30 აგვისტოს საქართველოს კონტროლის პალატასა და ლატვიის სახელმწიფო აუდიტორულ ოფისს შორის გაფორმებული ხელშეკრულების საფუძველზე, რაც ლატვიელ კოლეგებთან ერთად სამი სამინისტროს ერთობლივი ფინანსური აუდიტის ჩატარებას ითვალისწინებს: შრომის, ჯანდაცვისა და სოციალური უსაფრთხოების სამინისტრო; განათლებისა და მეცნიერების სამინისტრო; ინფრასტრუქტურისა და რეგიონული განვითარების სამინისტრო.