აშშ-ის პრეზიდენტმა დონალდ ტრაპმა კონგრესის წინაშე თავისი ყოველწლიური მიმართვა გააუქმა. მიზეზად დონალდ ტრამპმა ქვეყნის მთავრობის მუშაობის ნაწილობრივი შეჩერება, ე.წ. „შათდაუნი“ დაასახელა.
„ვიდრე „შათდაუნი“ გრძელდებოდა, ნენსი პელოსმა მიმიწვია კონგრესში ყოველწლიური მიმართვისთვის. მე დავთანხმდი. შემდეგ მან შეცვალა თავისი პოზიცია „შათდაუნის“ გამო და მთხოვა სიტყვით გამოსვლა მოგვიანებით გადამედო. ეს მისი პრეროგატივაა, მე მიმართვას გავაკეთებ, როდესაც შათდაუნი დასრულდება და მთავრობის მუშაობა განახლდება. მე აღარ ვეძებ სიტყვით გამოსვლისთვის ალტერნატიულ ადგილს, რადგან შეუძლებელია წარმომადგენელთა პალატის მნიშვნელობის, ისტორიისა და ტრადიციების შესაფერისი ადგილის პოვნა. მიმართვას უახლოეს მომავალში გავაკეთებ“, - დაწერა ტრამპმა მიკრობლოგ „ტვიტერზე“.
ტრამპის გადაწყვეტილებას წინ უძღოდა აშშ-ის წარმომადგენელთა პალატის სპიკერის, ნენსი პელოსის წერილი პრეზიდენტისადმი, სადაც ის წერს, რომ წარმომადგენელთა პალატას არ შეუძლია განიხილოს რეზოლუცია პრეზიდენტის კონგრესში მიწვევის შესახებ, სანამ სრულად არ აღდგება მთავრობის საქმიანობა.
როგორც წესი, წარმომადგენელთა პალატა პრეზიდენტს კონგრესში ყოველწლიური მიმართვისთვის სპეციალური რეზოლუციით იწვევს.
2018 წლის 22 დეკემბრიდან აშშ-ის მთავრობის მუშაობა ნაწილობრივ დახურულია. დონალდ ტრამპი კონგრესისგან ამერიკა-მექსიკის საზღვარზე კედლის ასაშენებლად დაფინანსებას ითხოვს, დემოკრატები კი პრეზიდენტის ამ მოთხოვნას კატეგორიულად არ ეთანხმებიან.