მე მხარს დავუჭერ სასამართლოში პროგრესს, რომელიც დღეს ცალსახად სახეზეა, - ამის შესახებ საპარლამენტო უმრავლესობის წევრმა ანრი ოხანაშვილმა ჟურნალისტის კითხვასთან [დაუჭერს თუ არა მხარს იუსტიციის უმაღლესი საბჭოს მიერ უზენაესი სასამართლოს მოსამართლეობის კანდიდატების წარმოდგენილ სიას] დაკავშირებით განაცხადა.
როგორც ოხანაშვილმა იურიდიულ საკითხთა კომიტეტის სხდომის დაწყებამდე ჟურნალისტებს განუცხადა, უზენაესი სასამართლოს მოსამართლეები არჩევის პროცესი გამჭვირვალე იქნება, ყველა იმ სუბიექტის ფართო ჩართულობით, ვინც უნდა იყოს ჩართული,
"დღეს კომიტეტზე პროცესი უნდა წარიმართოს იმ სამართლებრივი პროცედურების დაცვით, რომელიც გათვალისწინებულია საქართველოს პარლამენტის რეგლამენტით. რაც შეეხება კონკრეტულ საკითხებს, საქართველოს პარლამენტის თავმჯდომარემ უკვე განაცხადა ბრიფინგით, რომ მოსამართლეობის კანდიდატების სიის განხილვა შეჩერებულია. ჩვენი გუნდის გადაწყვეტილებით, ყველაფერი მოხდება გამჭვირვალედ, ყველა იმ სუბიექტის ფართო ჩართულობით, ვინც უნდა იყოს ჩართული", - განაცხადა ანრი ოხანაშვილმა.