სამწუხაროდ, შინაგან საქმეთა სამინისტრო და "ქართული ოცნება" კვლავ მიდის პირდაპირ პროვოკაციებზე და ახლა უკვე დაკავებულია ჩვენი ერთ-ერთი ლიდერი, დავით კირკიტაძე, - ამის შესახებ გაერთიანებული ოპოზიციის ერთ-ერთმა ლიდერმა გიორგი ვაშაძემ დავით კირკიტაძის დაკავებასთან დაკავშირებით ბრიფინგზე განაცხადა.
მისი თქმით, საქართველოს კონსტიტუციით, ოპოზიციას ჰქონდა გადაადგილების, შეკრებისა და მანიფესტაციის თავისუფლება.
„უფრო მეტიც, კანონი შეკრების და მანიფესტაციების შესახებ, ჩვენ გვქონდა უპრობლემოდ თელავში მისვლის უფლება. თუ მათ სურვილი ჰქონდათ რაიმე ტიპის შეზღუდვასთან, გადაადგილებასთან დაკავშირებით, ამის შესახებ ადმინისტრაციული აქტი უნდა გამოეცათ. ეს ჩვენთვის უნდა ეცნობებინათ“, - განაცხადა ვაშაძემ, რომელმაც აქვე აღნიშნა, რომ თუკი უსაფრთხოების მიზნით, შესასვლელი ჩაკეტილი იყო, ამის შესახებ ინფორმაცია ოპოზიციისთვის უნდა ეცნობებინათ.
მისივე თქმით, ყველა ის მოქმედება, რასაც პოლიციის ფორმაში ჩაცმული ადამიანები ატარებდნენ იქ, ეს იყო უკანონო ქმედება, შესაბამისად, აქციის მონაწილეებს ჰქონდათ უფლება, გაეთავისუფლებინათ გზა და გაეგრძელებინათ სვლა თელავისკენ, რაც იყო წინასწარ დაანონსებული.
ვაშაძის განცხადებით, გუშინ ყველანაირი კანონი იყო დარღვეული სამართალდამცველების მხრიდან.
„ხალხნო, კიდევ ერთხელ გეუბნებით, ეს არის კანონის გარეშე ქმედება, ყველა მუხლი დარღვეული გაქვთ, არც ერთ მუხლს არ იცავთ, არაფერს აღარ იცავთ. ჩვენ მოგიწოდებთ, რომ კანონის ფარგლებში დარჩეთ. პოლიციის ფორმაში ჩაცმული ადამიანები, ვინც იქ იდგნენ, ისინი არ ითვლებიან პოლიციელებად, იმიტომ, რომ არანაირი სამართლებრივი აქტი არ არსებობდა, რომ მათ ჰქონდათ გზის გადაკეტვის უფლება“, - აღნიშნა ვაშაძემ.
ცნობისთვის, გაერთიანებული ოპოზიციის წევრი დავით კირკიტაძე დააკავეს. კირკიტაძე დაკავებულია ველისციხეში გამართულ აქციაზე პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის.