გაერთიანებული ოპოზიციური პარტიების, “ძალა ერთობაშიას” პრეზიდენტობის კანდიდატის გრიგოლ ვაშაძის განცხადებით, რუსეთის 2008 წლის აგრესიის შემდგომ, საქართველოს პროკურატურა 2012 წლამდე აქტიურად იძიებდა დანაშაულებს. 2013 წლის შემდეგ კი, მუშაობა შენელდა.
“რუსეთის 2008 წლის აგრესიის შემდგომ, საქართველოს პროკურატურა 2012 წლამდე ძალ-ღონის დაუზოგავად იძებდა იმ დანაშაულებს, რომელიც საოკუპაციო არმიამ და სეპარატისტულმა ბანდ-ფორმირებებმა ჩაიდინეს ოკუპირებული ცხინვალის რეგიონსა და დანარჩენ ტერიტორიაზე. 2013 წლის შემდეგ ეს მუშაობა შენელდა, სანამ 2015 მარტში მინისტრმა წულუკიანმა არ შეატყობინა ჰააგის სისხლის სამართლის სასამართლოს, რომ საქართველო წყვეტს გამოძიებას, რის შედეგადაც უკვე ჰააგის საერთაშორისო სისხლის სასამართლის სასამართლო ჩაერთო ამ საქმეში და მოხდა ის, რაც მოსალოდნელი იყო ე.წ. “ქართული ოცნების” ხელისუფლების პირობებში.
საქართველოს სახელმწიფომ, მისი იუსტიციის მინისტრის სახით, ხელებს იბანს 2008 წლის ვეტერანებთან დაკავშირებით და აცხადებს მათ კერძო პირებად, რომლებმაც ინდივიდუალურად უნდა დაიცვან თავი ოკუპანტი სახელმწიფოს არასამთავრობო ორგანიზაციების მიერ შეთითხნილი ყალბი მასალების წინააღმდეგ. ეჭვგარეშეა, რომ როგორც ეს არის დაგეგმილი, რუსეთის ფედერაციის მიერ, თუ ამ საქმის მსვლელობისას ე.წ. “ქართული ოცნება” იქნება ხელისუფლებაში, მოხდება ჩვენი ჯარისკაცების, რომლებიც “ქართულმა ოცნებამ” კერძო პირებად გამოაცხადა, საქმეების განზოგადება საქართველოს სახელმწიფოს საწინააღმდეგოდ. შედეგად დავდგებით უმძიმესი საფრთხის წინაშე, როგორც სამშობლოს დამცველ ჯარისკაცსა და ინდვიდუალურ სვებედთან დაკავშირებით, ასევე ჩვენი ქვეყნის ეროვნულ ინტერესებთან დაკავშირებით, “ოცნებამ” და მინისტრმა წულუკიანმა შეძლეს წარმოუდგენელი, წინა ხელისუფლების დროს ოკუპანტი ქვეყნის პასუხისმგებლობის თემა შემოატრიალეს სქართველოს საწინააღმდეგოდ, იმისათვის, რომ თავისი ვიწროპარტიული ინტერესები დაიცვან, იმისათვის რომ შეინარჩუნონ თავისი თავი ხელისუფლებაში, პრეზიდენტ სააკაშვილს შეუქმნან პრობლემები, მათ პრაქტიკულად ხელი შეუწყვეს მთელი საგამოძებო პროცესის შემოტრიალებას საქართველოს საწინააღმდეგოდ”, – აღნიშნა გრიგოლ ვაშაძემ.