მირზა სუბელიანისა და თენგიზ კალანდიასგან მიღებულ ინფორმაციას გავაანალიზებთ სხვა ჩვენებების საფუძველზე, - ამის შესახებ საგამოძიებო კომისიის წევრმა ანრი ოხანაშვილმა გლდანში, სასჯელაღსრულების დაწესებულებიდან გამოსვლის შემდეგ ჟურნალისტებს განუცხადა.
მისი თქმით, მათ კომისისას დეტალური პასუხები გასცეს.
"ჩვენ დაახლოებით 7 საათის განმავლობაში გამოვკითხეთ 2 ბრალდებული. საუბარია თენგიზ კალანდიასა და მირზა სუბელიანზე. ძალიან დეტალური შეკითხვები დავსვით და მაქსიმალურად ვეცადეთ მიგვეღო დეტალური ინფორმაცია ბევრ საკითხზე. ჩვენ მიღებულ ინფორმაციას გავაანალიზებთ სხვა ჩვენებების საფუძველზე. დამატებით ვერაფერს ვიტყვი. შემდგომ ეს ინფორმაცია აისახება კომისიის დასკვნაში. ჩვენ დავსვით აბსოლუტურად ყველა ის შეკითხვა, რომელიც გაჟღერდა საზოგადოებაში. რომელთა შესახებაც არსებობდა შეკითხვები როგორც დაზარალებული ოჯახის, ისე საზოგადოების მხრიდან. ჩვენ გაგვცეს დეტალურად პასუხები", - განაცხადა ანრი ოხანაშვილმა.
ცნობისთვის,ხორავას ქუჩაზე მომხდარი მკვლელობის შემსწავლელი საპარლამენტო კომისიის წევრები ბრალდებულების - მირზა სუბელიანისა და თენგიზ კალანდიას გამოსაკითხად დღეს სასჯელაღსრულების დაწესებულებაში იმყოფებოდნენ.
