ექსპერტი არ იყო იმპერატიული, ის საუბრობდა მხოლოდ სავარაუდო ინფორმაციაზე, ის ისე საუბრობდა, თითქოს, ლექციაზე იყო, - განაცხადა ჟურნალისტებთან ხორავას ქუჩაზე მომხდარი მკვლელობის საქმის პროკურომა, ზვიად ფხაკაძემ.
"დაცვის მხარის მიერ წარმოდგენილი ექსპერტიზის დასკვნის გამოკვლევა მოხდა და ამ დასკვნასთან დაკავშირებით, დაიკითხა ექსპერტი მაია ნიკოლეიშვილი. თუმცა, მისი დაკითხვა დაცვის მხარის მიერ არ დარულებულა, ამასთანავე, ბრალდების მხარე მის ჯვარედინ დაკითხვას მოახდენს. იმის გათვალისწინებით, რომ ქალბატონი ექსპერტის დაკითხვა ჯერ არ დასრულებულა, ბრალდების მხარე იცავს კანონით დაგდენილი წესის მოთხოვნებს და იმ ჩვენების თაობაზე, რომელიც ჯერ დასრულებული არაა, კომენტარს ვერ გავაკეთებთ, შინაარსობრივად ვერ ვისაუბრებთ, თუმცა, დარწმუნებული ვარ, ის ინფორმაცია, რაც ქალბატონმა ექსპერტმა დააფიქსირა, აბსოლუტურ წინააღმდეგობაშია საქმეში არსებულ მტკიცებულებებთან", - აცხადებს ფხაკაძე.
პროკურორი გამორიცხავას, რომ საქმეში გარდა ორი დანისა, სხვა ბასრი საგანებიც ფიგურირებს.
"კიდევ ერთხელ გიმეორებთ, ეს აბსურდია. ბრალდების მხარეს მიაჩნია, რომ ქმედება ჩადენილია ბრალდებულების მიერ იმ სტანდარტებით, რა სტანდარტითაც სასამართლო განხილვის სტადიაზე ვიმყოფებით, უდანაშაულობის პრეზუმფციას არ ვარღვევთ, დანაშაული ჩადენილია იმ დანებით, რაც ამოღებულია. რაც შეეხება ექსპერტს, ის არ იყო იმპერატიული, ის საუბრობდა მხოლოდ სავარაუდო ინფორმაციაზე, ის საუბრობდა თითქოს ლექციაზე იყო. შესაბამისად, მისი ჩვენება სანამ ჯვარედინი დაკითხვა არ მოხდება, ვერ იქნება გაზიარებული სასამართლოს მიერ. ეს ჩვენი პოზიციაა, თუმცა, სასამართლო რა კუთხით გაიზიარებს, ეს ბრალდების მხარის გადასაწყვეტი არ არის", - აცხადებს ფხაკაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის, დავით სარალიძისა და ლევან დადუნაშვულის სიცოცხლე ემსხვერპლა.
