ამ წუთებში, ბათუმის საქალაქო სასამართლოში სასტუმრო ''ლეოგრანდში'' გაჩენილი ხანძრის საქმეზე ორი ბრალდებული პირის სასამართლო პროცესი მიმდინარეობს. ერთ-ერთი ბრალდებული გიორგი მიქელაძე აცხადებს, რომ უდანაშაულოა, რადგან იმ საწყობს ხელმძღვანელობდა, რომელიც სასტუმროს გარეთ იყო განთავსებული.
რაც შეეხება ადგილს, სადაც ცეცხლი გაჩნდა, დაცვის მხარე ამტკიცებს, რომ საწყობი შენობაში კუსტარულად იყო მოწყობილი და მისი კონტროლი ბრალდებულის პასუხისმგებლობა არ იყო.
თავს უდანაშაულოდ ცნობს ამ საქმეზე მეორე ბრალდებული, სასტუმროს მენეჯერი ფათიჰ იაუზიც.
ცნობისთვის, ბათუმში, სასტუმრო „ლეოგრანდში“ ხანძარი 24 ნოემბერს, დაახლოებით, 22:00 საათზე გაჩნდა.
ხანძრის შედეგად 11 ადამიანი დაიღუპა, მათგან საქართველოს 10 და ირანის ერთი მოქალაქე. დაშავდა 21 ადამიანი, მათგან ერთი ისრაელის მოქალაქეა, 5 კი - თურქეთის.
შინაგან საქმეთა სამინისტროს აჭარის პოლიციის დეპარტამენტის თანამშრომლებმა, ოთხთვიანი გამოძიების შედეგად, სასამართლოს განჩინების საფუძველზე, სასტუმრო „ლეოგრანდში“ სახანძრო უსაფრთხოების წესების დარღვევის ფაქტზე, ბათუმში, აღნიშნულ სასტუმროში მენეჯერულ პოზიციაზე მომუშავე 2 პირი: თურქეთის რესპუბლიკის მოქალაქე, 1979 წელს დაბადებული ფ.ი. და საქართველოს მოქალაქე, 1978 წელს დაბადებული გ.მ. დააკავეს.
მათ მიერ ჩადენილი დანაშაული 5-დან 8-წლამდე ვადით თავისუფლების აღკვეთას ითვალისწინებს.